داوای هاوتاکردنی نرخی بەنزینی هەرێم بە عێراق دەکرێت

نرخی بەنزین لە هەرێمی کوردستان بەرزبووەتەوە و سەرۆکی ئەنجومەنی پارێزگای سلێمانی و تۆڕی هەماهەنگی ڕێکخراوەکانیش داوای هاوتاکردنی نرخی بەنزینی هەرێم وەک عێراق دەکەن.


نرخی بەنزین و سوتەمەنی لە هەرێمی کوردساتاندا بەرزبوونەوەی بە خۆیەوە بینیوە، ئەمەش هاوڵاتیانی نیگەران کرد و بەشێک لە شۆفێران خۆپیشاندانیان ئەنجامدا، لەسەر هۆکارەکانی ئازاد حەمەئەمین، سەرۆکی ئەنجومەنی پارێزگای سلێمانی، بۆ ڕۆژنیوز دەدوێت.

ئازاد حەمەئەمین وتی: گرانبوونی نرخی نەوت پەیوەندی بە گرانبوونی بۆرسەی نەوتەوە هەیە لە جیهاندا، وە بەشێکی دیکەی پەیوەندی بەوەوە هەیە کە سوتەمەنی پارێزگای سلێمانی بە زۆری لە دەرەوەی هەرێمی کوردستانەوە دێت و نرخی گواستنەوەش گرانبووە.

وتیشی: پێویستە حکومەتی هەرێمی کوردستان گرنگی بە کردنەوەی پاڵاوتگەی نوێ بدات تاوەکو بتوانین هەموو پێداویستیەکانی سوتەمەنی لە سنوری ئەنجومەنی پارێزگای سلێمانی دابین بکەین و سوتەمەنی لەدەرەوە بۆ سلێمانی نەیەت بە نرخی گران.

ئازاد حەمەئەمین ئاماژەی بەوەشدا: لە ڕابردوو داوامان کردووە کە نرخی سوتەمەنی لە عێراق چەندە لە هەرێمی کوردستانیش بەهەمان شێوە بێت، لە عێراق نرخی لیترێک بەنزین بە ٤٥٠ دینارە و لە هەرێمی کوردستان بە ٧٠٠ دینارە.

لەسەر هەمان هۆکار، تۆڕی هەماهەنگی ڕێکخراوەکان نامەیەکیان ئاراستەی نێچیرڤان بارزانی سەرۆکی حکومەتی هەرێمی کوردستان کردووە و ڕایدەگەیەنن: تکایە خەڵک مەکەنە قوربانی کۆمپانیاکان، پێش بێینە شەقام ئەم نامەیە بە پێویست دەزانین.

لە ڕاگەیەندراوەکەدا هاتووە: لەسەر داوای خەڵک و گرانبوونی بەنزین لەکوردستان و جیاوازی نرخ لە هەرێم و موسڵ یان مەخمور وای کرد بە جدی هەوڵ راستی ئەم هەواڵە بدەین، ئێستا هەمان ئەو بەنزینەی لە خورمەڵە دەچێت بۆ مەخمور لە نێوان (٤۲٥ بۆ ٤٥٠) دینارە، هەمان ئەو بەنزینە لە هەولێر لە نێوان ( ٦۹٠ بۆ ۷۱٠ ) دینارە.

داواکاریان لە نێچیرڤان بارزانی هەبوو، کە بۆ بەرژەوەندی خەڵک بڕیارێک بدات، بۆ هاوتاکردنی نرخی بەنزین لە نێوان شارەکانی عێراق و هەرێم.

س.ح