دوایین ئاماری قوربانی و زیانەکانی بومەلەرزەکەی باکوری کوردستان

لە ئەنجامی بومەلەرزەکەی باکوری کوردستاندا، بەپێی دواین ئامار، ٢٧ کەس گیانیان لەدەستداوە و ٩٢٩ کەسیش بریندارن، هەروەها ٣٠ کەس لە ژێر پاشماوەی ڕووخاوی باڵەخانەکاندا ماونەتەوە، هەرچەندە ئاماری جیاوازتر دەخرێنە ڕوو.


بوومەلەرزەکە کاتژمێر ٠٨:٥٥ خولەک ڕوویداوە، بە قوڵایی ١٠ کیلۆمەتر لە سەنتەری ناوچەی خوخێ'ی سەربە پارێزگای خارپێت لە باکوری کوردستان بەپلەی ڕێختەری ٦.٨ ڕوویدا، ئامارەکان جیاوازن، زانیارییەکان باس لە گیانلەدەستدانی ٢٧ کەس دەکەن، بەڵام حکومەتی تورکیا دەڵێت ١٩ کەس گیانایان لەدەستداوە.

جیا لە سەنتەری خوخێ، لە ناوچەی پۆتورگی شاری مەلەتی باکوری کوردستان زیانی زۆر بەر ١٠٠ باڵەخانە کەوتووە و بەشێکیان ڕووخاون، بەڵام زیانە گیانییەکانیان ڕوون نەبووەتەوە.

ژووری پزیشکانی خارپێت دەڵێت ٢٧ کەس گیانایان لە دەستداوە، بەڵام بەپێی قسەی وەزیری تەندروستی تورکیا، ١٩ کەس گیانیان لەدەستداوەو ٥٥١ کەس برینداربوون، هەروەها ٣٠ کەس لە ژێر داروپەردووی باڵەخانەکادا ماوەتەوە.

هەروەها بەڕێوەبەرایەتی بەهاناوەچوونی لێقەوماوانی کارەساتەکان ڕایگەیاندووە، لە ئەنجامی بومەلەرزەکەدا لە 'خارپێت، مەلاتی، ئامەد، سەمسور، باتمان، مەراش و ڕوحا' بەگشتی ٩٢٩کەس برینداربوون.

س.ح