سكاڵا لەسەر كۆمپانیاكانی ئاسیا و كۆڕەك تۆمار كرا

بە تۆمەتی فریودانی هاوڵاتیان و فڕۆشتنی کارتەکانی باڵانس بەبێ ڕەچاوکردنی نرخی نووسراو لەسەری، دوو پەرلەمانتاری  پەرلەمانی هەرێمی كوردستان سكاڵای یاساییان لەسەر هەریەكە لە كۆمپانیاكانی ئاسیاسێڵ و كۆڕەك تێلیکۆم تۆمار کرد.


ئەمڕۆ پەرلەمانتارانی هەرێم 'هاوڕێ پەنا محەمەد لە فراکسیۆنی یەکێتی و جەلال محەمەد لە فراکسیۆنی گۆڕان'، کە ئەندامن لە لیژنەی شارەوانی و گواستنەوەی پەرلەمانی هەرێمی كوردستان، بە تۆمەتی گرانی نرخ سكاڵای یاساییان لە سەر كۆمپانیاكانی ئاسیاسێڵ و كۆڕەك تێلیکۆم تۆمار کرد.

جەلال محەمەد پەرلەمانتار لە فراکسیۆنی،  یەكێك لەو پەرلەمانتارانەی كە ئەمڕۆ سكاڵاكەی تۆماركرد، لە كۆنگرەیەكی ڕۆژنامەنووسیدا دەربارەی هۆکاری سکاڵاکەیان وتی: هەردوو كۆمپانیا لە فرۆشتنی باڵانس هەڵساون بەجۆرە فلێكردنێک لەگەڵ بەشداربوواندا، بە فرۆشتنی باڵانسی ١٠ هەزار دیناری بە ١٢ هەزار دینار.

وتیشی: ئەم ڕەفتارە زەرەروزیانی زۆری ماددی بە هاوڵاتیان و بەشداربووان گەیاندووە، هەروەها پێجەوانەی یاساشە پاڵپشت بە هەردوو ماددەی ٤٥٦ و ٤٥٣ لە یاسای سزادانی عێراقی، بۆیە داواكارین لە دادگا ڕێكاری یاسایی لە دژی سكاڵا لێكراوان بگرێتەبەر بە كردنەوەی پەڕاوی لێكۆلینەوە بۆ ئەم مەبەستە.

س.ح