سەفین دزەیی: نەوتی کەرکوک بفرۆشرایە پێنج ملیارد دۆلار داهاتی دەبوو

سەفین دزەیی، وتەبێژی حکومەتی هەرێمی کوردستان ڕایدەگەیەنێت، کە پێشنیاریانکردووە بۆ عێراق نەوتی کەرکوک لەڕێگای سۆمۆبفرۆشرێت، بەڵام تا ئێستا جێبەجێنەکراوە، وتیشی: ئەگەر ئەو نەوتە بفرۆشرایە ئەوا لەمانگی یەكەوە تاوەكو ئێستا نزیكەی پێنج ملیارد دۆلار داهاتی بۆ عێراق دەبوو.


ئەمڕۆ لە شاری هەولێر، سەفین دزەیی، وتەبێژی حکومەتی هەرێمی کوردستان کۆنگرەیەکی ڕۆژنامەنووسیی ئەنجامدا.

لە کۆنگرەکەدا تیشکی خستە سەر ئاسایشی ناوچە دابڕێندراوەکان و وتی:"سوپای عێراق ناتوانێت ئاسایشی ئەو ناوچانە دابین بكات و هەندێ گروپی چەكدار دروست بوونەتەوە و ڕۆژانە ڕووداوی دڵەتەزێن رودەدەن".

دزەیی، وتیشی:"ئێمە جەختمان لەوەكردووەتەوە، كە ڕێكکەوتنی سێ لایەن(هەرێم- عێراق و هاوپەیمانان) هەبێت بۆ ئەوەی ئاسایشی ناوچەكە بپارێزرێن، كە بەداخەوە تائێستا ئەو رێككەوتنە دەستیپێنەكردوە".

سەبارەت بە بۆردوومان و هێرشەکانی تورکیا و ئێران بۆسەر باسوری کوردستان-یش، ناوبراو، جارێکی دیکە بەجۆرێک ڕەوایەتیی دا بەو هێرشانە و وتی:"حکومەتی هەرێم، جەختی لەوەكردووەتەوە كە نابێت هاوڵاتی مەدەنی بكرێنە ئامانج، بەتایبەت كە بەشی زۆری لەو گوندانە بوونەتە شوێنی ململانێی پەکەکە و ئەو وڵاتانە، هەرچەندە نابێت ئەو وڵاتانە بەم بیانوانە بەردەوام بین لەتۆپباران كردن و دەستدرێژیی بۆ سەر خاكی هەرێم، هێزەچەكدارەكان و ئەو وڵاتانەش دەبێت بارودۆخی هەرێم لەبەرچاو بگرن".

لەبارەی قەیرانی داریی هەرێمی کوردستانیشەوە، سەفین دزەیی، وتی: ئێستا خەریكە بەشێكی باش لەهۆكارەكانی قەیرانی دارایی كەم دەبێتەوە و لەمانگی ئاداری ئەمساڵ ٣٠ رۆژ جارێك موچە وەردەگرن و زۆرینەی ئەو كۆمپانیایەی بەتایبەت ئەوانەی لەبواری وزە كاریان دەكرد هەرێمی كوردستانیان جێهێشتبوو، ئێستا گەراونەتەوە.

راشیگەیاند:ئەگەر بڕێك لەداهات زیاتر بێت و پارەی بەغدا بەردەوام بێت هەوڵەكان بۆ ئەوەیە پاشەكەوت بەیەكجارەكی نەمێنێ.

سەفین دزەیی، ئاشكراشیدەكات، کە سەرۆكی حكومەتی هەرێمی كوردستان لەكۆنفرانسی وزەی داڤۆس لەمانگی یەكی ئەمساڵ پێشنیاری كردووە بۆ حەیدەر عەبادی، سەرۆك وەزیرانی عێراق تاوەكو نەوتی كەركوك، كە نزیكەی ٢٥٠ بۆ ٣٠٠ هەزار بەرمیلی ڕۆژانەیە لەرێگەی بۆری نەوتی هەرێمەوە كۆمپانیای سۆمۆ بیفرۆشێت، و داهاتەكەشی بۆ خەزینەی گشتی لەبەغدا بگەڕێتەوە تاوەكوهەموو عێراق سودمەند بن، لەسەرەتا پێشوازیی لێكرا، بەڵام تاوەكو ئێستا هەر لەچوارچێوەی پێشنیار ئەو بابەتە ماوەتەوە.

وتەبێژی حکومەتی هەرێم، وتیشی: ئەگەر ئەو نەوتە بفرۆشرایە و بەغدا پێشنیارەكەی جێبەجێكردبایە، ئەوا لەمانگی یەكەوە تاوەكو ئێستا نزیكەی پێنج ملیارد دۆلار داهاتی بۆ عێراق دەبوو، كەئەوكاتە عێراق تەنها كرێی گواستنەوەی نەوتەكەی دەدا كە لەماوەی یەك ساڵ نزیكەی ٢٥٠ ملیۆن دۆلار بوو.

بەپێی زانیارییەکان، کێڵەگەی نەوتی هاڤانا و بای حەسەن، کە دوای ١٦ی ئۆکتۆبەر لەژێر دەستی حوکمەتی هەرێم دەرهێندارن و خرانە ژێر کۆنترۆڵی حکومەتی عێراق، بەهۆی ئەوەی کۆدەکانیان لای پارتی دیموکراتی کوردستان عیراق- ە، عێراق نەیتوانیوە نەوتەکەی هەناردە بکات.

ش.ف