فەرمانبەرانی هەولێر: حكومەت دەبێت قەرزەكانمان بداتەوە نەك مووچەكانمان ببڕێت

پرسی وەگرتنەوەی پێشینەكان موچەخۆرانی شاری هەولێری نیگەران كردووە و هاوڵاتیان دەڵێن: خەڵك چەند ساڵێكە لەقەیران‌و دۆخێكی نالەباردایە، بۆیە پێویستە حكومەت لەو پاشەكەوتەی لایەتی قەرزەكان وەربگرێتەوە نەك موچەكانمان ببڕێت. پەرلەمانتارێكیش دەڵێت: لە بری ئەوەی حكومەت داوی قەرزی فەرمانبەران بكات، با ئەو موچانەی لایەتی بیداتەوە.


بەهۆی قەیرانی داراییەوە لە ساڵانی ڕابردوودا وەرگرتنەوەی پێشینەكان لەلایەن حكومەتەوە چاوپۆشی و ئاسانكاری بۆ كرابوو، بەڵام دوای لابردنی پاشەكەوت، ڕاستەوخۆ بڕیاری وەگرتنەوەی پێشینەو قەرزەكانیدا ئەوەش لەڕێگەی بڕینی موچەوە، ئەگەرچی بەپێی زانیارییەكانی ڕۆژنیوز، وەزارەتی دارایی هەرێم لە ئێستا بڕیاری لێبڕینی موچەی لەم مانگەدا ڕاگرتووە ، بەڵام لە پلانیدایە لە مانگەكانی داهاتوودا لەبەرامبەر پێنەدانی پێشینەكان موچەی فەرمانبەران ببڕێَت.

لەسەر ئەو پرسە گۆران سەعید، هاوڵاتییەكی شاری هەولێرە و بۆ ڕۆژنیوز قسەی كرد و وتی: حكومەتی هەرێمی كوردستان دەبێ ڕەچاوی ڕەوشی خەڵك بكات، چونكە چەند ساڵێكە قەیرانە و خەڵك لە ڕەوشێكی نالەباردایە. وتیشی: دەبێ حكومەتی هەرێم لەسەر خۆبێ نابێ و ناكرێت حكومەت یەك موچە بدات و داوای قەرز لە هاوڵاتیان بكاتەوە، دەكرێت ئەو پارەیەی لەلای حكومەتە بە ناوی پاشەكەوت پارەی ئاو و كارەبا و رسومات و سزای سەرپێچی ئوتۆمبێلی لێ بدرێتەوە.

فارس عومەر، هاوڵاتیەكی دیكەی شاری هەولێرە و پێیوایە دەبێت سەرەتا پاش ئەو هەموو نەهامەتییەی خەڵك لە قۆناغی شەڕی داعشدا بەسەریداهات حكومەت ئەژمارێكی بانكی بۆ فەرمانبەران بكردایەتەوە بۆ ئەوەی هاوڵاتیان ئەو قەرزانەی لایانە لەو ڕێگەیەوە بیدەنەوە، چونكە ئەگەر ڕەچاوی بارودۆخی هاوڵاتیان نەكرێت ئەوە دۆخەكە خراپتر دەبێت و حكومەت دەبێت ڕەچاوی ڕەوشی ژیانی خەڵكی بكات.

لەسەر هەمان پرس و دەربارەی ڕۆڵی پەرلەمانی هەرێمی كوردستان بۆ داكۆكیكردن لە مافی هاوڵاتیان، دیاری ئەنوەر، پەرلەمانتاری فراكسیۆنی نەوەی نوێ، ڕایگەیاند، لە بری ئەوەی حكومەت داوی قەرزی فەرمانبەران و هاوڵاتیان بكات، دەبوایە چاوەڕێ بكات بازاڕ ببوژێتەوە و باری دارایی ببوژێتەوە.

وتیشی: پرۆژەیاسایەكمان پێشكەش كردووە، بۆ ئەوەی ئەو قەرزەی  هاوڵاتیان لایانە حكومەت لەو پاشەكەوتەی لایەتی لە فەرمانبەرانی وەربگرێتەوە و قەرەبوویان بكاتەوە.

ئاماژەی بۆ ئەوەشكرد، حكومەت تا ئێستا مووچەی زیاتر لە ٨ مانگی نەداوە بە فەرمانبەران و ٣٤ مانگیش مووچەی بە پاشەكەوتەوە داوە، لەو ماوەیەشدا ٢٣ مانگ چارەكە مووچەی داوە بە فەرمانبەران، دوای ئەو هەموو ناحەقیەی بەرامبەر بە فەرمانبەرانی ئەم هەرێمە كردی و بێ شەرمانە دەستی برد بۆ قوتی فەرمانبەران، تا ئێستا یەك مانگ مووچەی تەواوی بێ پاشەكەوتی داوە بە فەرمانبەران و یەكەم هەنگاو لەبری ئەوەی هەنگاو بنێت بۆ دانەوەی قەرزی فەرمانبەران، سەرقاڵی لێسەندنەوەی قەرزە لە هاووڵاتیان و فەرمانبەران.

 وەزارەتی دارایی و ئابووری حكومەتی هەرێم، لەڕێنمایی ژمارە 5ی وەزارەتەكەیدا لە 10-3-2019 داوای لە سەرجەم گەنجینەكان كرد وەرگرتنەوەی پێشینەكان كار پێبكەنەوە.

ك.س