قەدەغەی هاتووچۆ وارسی ٤٥٠٠ شەهید لە چاوەڕوانیی مووچەدا دەهێڵێتەوە           

لە شاری کەرکوک کەسوکاری نزیکەی پێنج هەزار شەهید لە چاوەڕوانیی وەرگرتنی مووچەکانیاندان، بەڵام بەهۆی قەدەغەی هاتووچۆوە ناتوانن وەری بگرن، بەرپرسێکیش دەڵێت، داوایان کردووە حکومەتی هەرێم مووچەی ئەو کەسانە ڕەوانەی کەرکوک بکات و تا ئێستا ڕەزامەندیی نیشان نەدراوە.


ماوەی چوار ڕۆژە وەزارەتی دارایی و ئابووریی حکومەتی هەرێمی کوردستان دەستی بە دابەشکردنی مووچەی کەسوکاری شەهیدان و ئەنفالکراوان کردووە، بەڵام لە شاری کەرکوک کەسوکاری چوار هەزار و ٥٠٠ شەهید بەهۆی قەدەغەی هاتووچۆوە ناتوانن بڕۆن بۆ وەرگرتنی مووچەکانیان.

لە ڕابردوودا وارسی ئەو شەهیدانە، کە لە شاری کەرکوک نیشتەجێن، لە بانکەکانی برایەتیی لە هەولێر و چەرموو لە شارۆچکەی چەمچەماڵ مووچەکانیان وەر دەگرت، بەڵام ئێستا بەهۆی قەدەغەی هاتووچۆوە ناتوانن لە شارەکەیان بچنە دەرەوە بۆ وەرگرتنی مووچەکانیان، وەزارەتەکانی دارایی و کاروباری شەهیدان و ئەنفالکراوانی حکومەتی هەرێم-یش ئەو کێشەیەیان چارەسەر نەکردووە.

لەبارەی ئەو کێشەیەوە، خەلیل ڕەحیم، بەڕێوبەری بەڕێوبەرایەتیی كەركوكی وەزارەتی شەهیدان و ئەنفالكراوان بە ڕۆژنیوزی وت: بۆ موچەی ئەم مانگە ئێمە داوامان كردووە مووچەكە بنێرنە كەركوك، بەو پێیەی كەسوكاری شەهیدان ناتوانن بچنە هەولێر و چەمچەماڵ بەهۆی قەدەغەی هاتوچۆەوە، بەڵام تا ئێستا ڕەزامەندیی نیشان نەدراوە و چاوەڕوانی وەزارەتین تا وەڵاممان بداتەوە.

بە وتەی خەلیل ڕەحیم، بڕیارە ئەمڕۆ وەزیری وەزارەتی کاروباری شەهیدان لەگەڵ سەرۆكایەتی حکومەتی هەرێم ئەم بابەتە بخنە بەر باس، وتیشی:"ئێمە وەك بەڕێوبەرایەتیی کاروباری شەهیدان ئامادەیمان دەربڕیووە، كە مووچەكە لە بەڕێوبەرایەتییەکەمان دابەش بكرێت و لە ڕووی تەندروستییەوە ئامادەکاریی تەواومان کردووە".

 

ش.ف