پەرلەمانتارێک: لەپێناو وەزیری داراییدا بەرپرسانی هەرێم موچەی فەرمانبەرانیان خستووەتە مەترسییەوە

پەرلەمانتار کاوە محەمەد، لە نووسینێکدا ئاماژە بەوەدەکات، کە دەسەڵاتدارانی بەغدا بۆ ئەوەی بودجەی هەرێم ڕابگرن شکاتیان لە وەزیری دارایی کردووە، بەرپاسانی هەرێمیش لەپێناو مانەوەی وەزیری دارایی لەپۆستەکەی موچەی فەرمانبەرانی هەرێمیان خستووەتەوە مەترسییەوە.


کەمێک پێش ئێستا، کاوە محەمەد، پەرلەمانتاری ئەنجومەنی نوێنەرانی لە نووسینێکدا لە تۆڕی کۆمەڵایەتی فەیسبوک نووسینێکی لەبارەی کێشە داراییەکانی نێوان حکومەتی هەرێمی کوردستان و حکومەتی ناوەندی عێراق بڵاوکردووەتەوە.

لە نووسینەکەی کاوە محەمەد-دا هاتووە: ساڵێک زیاترە داوا لەدەسەڵاتدارانی هەرێم دەکەین بەپێی یاسای بودجەی ساڵی (٢٠١٩) نەوت تەسلیمی بەغدا بکەن، لیستی موچەخۆران و پێشمەرگە بنێرن، پێیاندەڵێین مەرج نییە تاسەر بەغدا ئەو پارەیە بنێرێت، دەبێ حیسابی بەرزی و نزمی نرخی نەوت بکەن و چیتر بێباک نەبن، هیچیان نەکرد، ‌(عادل عبدالمهدی) کە عەرابی ڕێککەوتنە نەوتییەکانی بەغدا و هەرێمە و گوێی بەگوشارەکان نەدا و بەردەوام و مانگانە پارەی موچەی هەرێمی ناردووە، بڕیاربەدەستانی هەرێم ئەویشیان ئیحراجکرد، کەچی ئێستا، کە نرخی نەوت هاڕەی کردووە، ئەو دەسەڵاتدارە شکستخواردووانە دەیانەوێ بەغدا بەوە ڕازی بکەن کە (٢٥٠ هەزار) بەرمیل نەوتی ڕۆژانە تەسلیم بکەن، لەبەرامبەردا هەموو مانگێک بەغدا نزیکەی تریلیۆنێک دینار، وەک بەشە بودجەی هەرێم بنێرێت، ئەمە ڕێک دەبێ پێیانبوترێت؛ ”ئەوەی ئێستا دەیکەن بە کچێنی بتانکردایە، ئەوەی بە کچێنیش کردتان، دەبوو ئێستا بیکەن“.

لە درێژەی نووسینەکەدا هاتووە: بێگومان ئەو بێباکییەی حکومەتی هەرێم، لەگەڵ دابەزینی زۆری نرخی نەوت، وایکرد گوشارەکانی بەغدا، چ وەک لایەنی سیاسی و چ وەک پەرلەمانتاران، زیاتر و بەهێزتربن بۆ ڕێگریکردن لەناردنی مووچەی هەرێم و دەیانەوێ لە ڕێگەی شکاتکردن لەوەزیری دارایی-ەوە ئەو پرسە پێشبخەن و هەوڵ و هەنگاوی دیکەیش بۆ هەمان مەبەست لەئارادایە، کەچی لایەنە سیاسییە پۆستخواز و پارەخۆرەکانی هەرێم، وا ئێستا لەمیانی گفتوگۆکانی پێکهێنانی حکومەتەکەی (مستەفا کازمی)دا، داواکاری هەرە لەپێشیان ئەوەیە کە وەزیری دارایی لەشوێنی خۆی دابنرێتەوە و پشکی خۆیان لەوەزارەتەکان زامنکەن، ژێربەژێریش خەریکی لێدانی هەموو دەرگاکانن، هەر زووش، تەنانەت پێش ڕاسپاردنیشی بۆ پێکهێنانی کابینەی تازە، سەرۆکی هەرێم و دواتریش زۆربەی لایەنە سیاسییەکانی هەرێم پشتیوانیان لەکازمیەک کرد کە کەس نازانێ چی بۆ کورد لەهەگبەدایە.

لە کۆتایشدا هاتووە: ئێمە دەزانین و دڵنیاین کە دەسەڵاتدارانی هەرێم هەرگیز باکیان بە ژیان و مووچەی خەڵک نەبووە و نیە، بۆیەش لەسەر سباسەتی بێباکی و لەدەستدانی دەرفەتەکان بەردەوامن و دیسانەوە مووچەی خەڵکیان خستەوە بەردەم هەڕەشەوە، بەڵام ئێمە، ئەو پەرلەمانتارانەی دەمێکە ئەم دەسەڵاتە نابەرپرسیارەی هەرێممان ناسیوە، هەموو هەوڵێک دەدەین کە مووچەی خەڵک بەپێی یاسای بودجە، نەبڕدرێ و جارێکی دیکە خەڵکی هەرێم باجی سیاسەتە شکستخواردووەکانی حکومەتی هەێم نەدەن.

د.ع