پەرلەمانتارێک گەندەڵییەکی گەورە و مەترسیدار ئاشکرا دەکات

عەلی حەمەساڵح، ئەندامی پەرلەمانی هەرێمی کوردستان نووسراوێک ئاشکرا دەکات، کە ڕێگەپێدانە بە کۆمپانیایەک بۆ هاوردەکردن و هەناردەکردنی چەندین جۆری سوتەمەنیی لەنێوان تورکیا و هەرێمی کوردستان و بە "گەندەڵییەکی گەورە و مەترسیدار" ناوی دەبات.


ئەمڕۆ عەلی حەمەساڵح، ئەندامی پەرلەمانی هەرێمی کوردستان لە فراکسیۆنی گۆڕان لە پەڕەی تایبەتی خۆیەوە لە تۆڕی کۆژمەڵایەتیی فەیسبووک نوسراوێکی وەزارەتی سامانە سروشتییەکانی بڵاوکردووەتەوە، کە واژۆی فەرەیدون ڕەحمان، بەڕێوبەری گشتیی کاروباری کارگێڕیی و دارایی لەسەرە و هاوپێچ لەگەڵ یاداشتێک، کە ئاڕاستەی سەرۆکی حکومەتی هەرێمی کوردستانی کردووە.

عەلی حەمەساڵح، نووسیوێتی:"حه‌وت ڕۆژ پێش ئێستا به‌ نووسراوێک له‌ وه‌زاره‌تی سامانه‌ سروشتیه‌کان گه‌نده‌ڵییه‌کی گه‌وره‌و مه‌ترسیدار کراوه‌".

هەروەها، نووسیوێتی:"هه‌رچه‌نده‌ به واژۆی به‌ڕێوبه‌رێکی گشتی کراوه‌، به‌ڵام تۆڕێکی ئێجگار گه‌وره‌ی له‌ پشته‌، تێپه‌ڕبوونی ئه‌م نوسراوه‌ گه‌وره‌ترین دۆسیه‌ی گه‌نده‌ڵییه‌ و بێ ده‌سه‌ڵاتکردنی حکومه‌ته"‌.

وەک عەلی حەمەساڵح باسی دەکات"ته‌نیا ئه‌م کاغه‌زه‌ به‌هاکه‌ی ٧٣٨ملیۆن دۆلاره‌!، قازانجی قۆرخکاریی زیاتر له‌ دوو ملیار دۆلاره!".

ڕوونیشیکردووەتەوە"ماوه‌ی زیاتر له‌ شه‌ش مانگه‌ ڕێگا به‌ هیچ کۆمپانیایه‌ک نادرێت هاورده‌ و هه‌نارده‌ی به‌رهه‌مه‌کانی نه‌وتی خاوبکات، حه‌وت ڕۆژ پێش ئێستا و ٢٠١٩/٩/١، ڕه‌سیدێکی ٤١ ملیۆن ته‌نی بۆ هه‌موو جۆره‌کانی به‌رهه‌می نه‌وت، ده‌درێته‌ یه‌ک کۆمپانیای نه‌ناسراو!، به‌مه‌ش تا چوار ساڵی حکومه‌تی هه‌رێم هیچ ده‌سه‌ڵات و بڕیارێکی به‌سه‌ر به‌رهه‌می نه‌وتدا نامێنێت".

عەلی حەمەساڵح، زیاتر ڕوونیدەکاتەوە"له‌به‌ر ئه‌وه‌ی ڕه‌سید به‌هیچ کۆمپانیایه‌ک نادرێت و ته‌نیا به‌م کۆمپانیا دراوه‌، ئه‌گه‌ر ئه‌م کۆمپانیا ته‌نیا ڕه‌سید بفرۆشێت ئێستا ته‌نی ١٨ دۆلار ده‌کات، به‌مه‌ش ته‌نیا به‌م کاغه‌زه‌ ٧٣٨ ملیۆن دۆلاری ده‌ستده‌که‌وێت!".

ئەو پەرلەمانتارە، ئاماژە بۆ ئوە دەکات"ئه‌م گرێبه‌سته‌ی به‌ڕێوبه‌رێک ئیمزای کردووه‌، به‌هاکه‌ی ١٠ ملیار دۆلاره‌! سه‌رۆک وه‌زیرانی عێراقیش ده‌سه‌ڵاتی ئه‌وه‌ی نیه‌ ڕێگا پێدانێکی وا گه‌وره‌ واژووبکات، ج جای به‌ڕێوبه‌رێکی گشتی!"، دەشپرسێت"ده‌یانجار حکومه‌تی هه‌رێم وتوویه‌تی نه‌وت ناپاڵێوم، ئێتر ئه‌م هه‌موو ملیۆن ته‌نه‌ ئه‌گه‌ر هه‌نارده‌ی بکات له‌ کوێوه‌ دێت؟".

پەرلەمانتارەکەی هەرێم، ئەوەشی نووسیووە:"ئه‌گه‌ر هاورده‌کردنی ئه‌م سوته‌مه‌نیه‌ بۆ ناو هه‌رێمی کوردستان و عێراق بێت چه‌ندین جار مه‌ترسیدارتره‌، چونکه‌ نه‌فتاو کۆندێنسه‌یت ئێستا له‌گه‌ڵ ماده‌ی پترۆ کیمیاوی تێکه‌ڵده‌کرێن و وه‌ک به‌نزین ده‌فرۆشرێت، که‌ ئه‌مه‌ هۆکاری سه‌ره‌کی نه‌خۆشی شێرپه‌نجه‌یه"‌.

گومانیشی لە گەورەیی قەبارەی مامەڵيکە هەیە، کە وەک خۆی دەڵێت، ١٠ ملیار دۆلارە "له‌کاتێکدا کۆی داهاتی نه‌وتی بۆری له‌ ساڵێکدا ده‌درێته‌ وه‌زاره‌تی دارایی ٣ ملیار دۆلاره‌، ئیتر ئه‌م هه‌موو به‌رهه‌مه‌ نه‌وتییه‌ له‌ کوێوه‌ دێت، چۆن ساغ ده‌بێته‌وه‌".

عەلی حەمەساڵح، پرسیارێکی دیکە دەکات"ئه‌م کۆمپانیا نه‌ناسراوه‌ ئه‌م هه‌موو توانایه‌ی له‌ کوێ بوو له‌ ڕۆژێکدا ١١٢٠ (هه‌زارو ١٢٠ تانکه‌ر) به‌ به‌رهه‌می نه‌وته‌وه‌ بباته‌ ده‌ره‌وه‌ی ئیبراهیم خه‌لیل و یان بیهێنێت؟".

لە کۆتاییشدا نووسیوێتی"ته‌نیا ئه‌و پاره‌ی وه‌ک مه‌نه‌فێست ده‌ستده‌که‌وێت ڕۆژانه‌ ٥٨٠ هه‌زار دۆلار(٥٨ ده‌فته‌ره‌)، ئه‌ویش ته‌نیا کاغه‌زێکه‌ ڕۆژانه‌ چه‌ند کۆمپانیایه‌ک دروستی ده‌که‌ن و به‌ ئیجباری ده‌یده‌نه‌ بارهه‌ڵگره‌کان و ئۆتۆمبیلی دیکه‌ش، داهاته‌که‌شی بۆ خۆیانه‌!".

ش.ف