"کە داعش نزیکی هەولێربوو تەنها گەریلا و چەند خۆبەخشێک مابوون"

چاودێرێکی سیاسیی باس لە ڕۆڵی گەریلا لە باشوری کوردستان دەکات، وەک خۆی دەڵێت، لە کاتی هێرشی چەتەکانی داعشدا لە سنووری مەخمور بووە و شاهیدی ئەوە دەدات "شەڕ لەشاری هەولێر نزیك بووبووەوە، تەنها گەریلا و ئەو بەشە بچوكەی خەڵكی خۆبەخش مابوون"، هەروەها داوا دەکات، کە گەریلا بەردەوامیی بدات بە پاراستنی باشوری کورستان.


ئەگەرچی گەریلاکانی هەپەگە و یەژاستار، لەکاتی هێرشی چەتەکانی داعشدا بۆ سەر باشوری کوردستان لە گوڵاڵەوە "جەلەولا"، تا کەرکوک، شەنگال و مەخمور و زۆر شوێنی تر بەرخۆدانی گەورەیان کرد و شەهیدیان بەخشی، بەڵام ناوبەناو دەسەڵاتدارانی هەرێمی کوردستان هەبوونی پەکەکە لە باشوری کوردستان بە نەرێنیی دەزانن، لەو بارەیەوە عەلی مەحمود، چاودێری سیاسیی و یەکێک لە شاهیدانی کاتی هێرشی چەتەکانی داعش بۆ مەخمور، بۆ ڕۆژنیوز دەدوێت و باس لە بەرخۆدانی گەریلا لە باشوری کوردستان دەکات.

عەلی مەحمود شایەتحاڵی کاتی داگیرکردنی شارۆچکەی مەخمورە لەلایەن چەتەکانەوە، لەوبارەیەوە باسی ڕۆڵی گەریلای کرد و وتی: من ئەوڕۆژەم لەبیرە كەكاتێك شارۆچكەی مەخمور داگیركرا، ئەوكاتە١٠ بۆ١٢ كەسی خۆبەخشی  باشوری كوردستان  لەگەڵ گروپێكی گەریلالە سەر چیای قەرەچوغ مابوونەوە، مانەوەی ئەوانیش لەو كاتەدا زۆرگرنگ و كاریگەربوو، چونكە ئەو كات  هێزی پێشمەرگە و هاوڵاتیانیش لە مەخمور نەمابوون، ئەگەر وێنای ئەوڕووداوە مێژووییە بكەین، ئەوە دەردەكەوێت كە گەریلاكانی پەکەکە ڕووبەڕووبوونەوەیەكی بەهێزیان ئەنجام دا، لەوەشدا ئامانجیان تەنها پاراستنی خاكی باشوری كوردستان بوو.

عەلی مەحمود، سەرنجی خستە سەر دۆخی ئەو کاتەی هەولێر کە مەترسی لەسەر بووە و وتی:"من خۆم وەك شایەتحاڵ لەسەر چیای قەرەچوغ بینیم لەو ڕەوشە مەترسیدارەی لەشاری هەولێر نزیك ببووەوە، كە بەشێكی زۆری ڕێگای'مەخمور–هەولێر' و 'گوێڕ – هەولێر' چۆڵكرابوو، تەنها گەریلا و ئەو بەشە بچوكەی خەڵكی خۆبەخشی  باشوری كوردستان بوو لەو شوێنانە مابوونەوە"، هیواشی خواست، کە گەریلاكان بەو شێوەیە بەردەوامبن لە پاراستنی خاكی باشوری كوردستان".

هەروەها داوای کرد، لە بەرامبەر هێزی دەوڵەتی تورک و ئێران و وڵاتانی ناوچەکە و پیلانەکانیان، کورد هەوڵی یەکدەنگی بدات و یەکهەڵوێست بێت.

ش.ف