یەكەمین پێشانگای نەوت و غاز و وزە لە كەركوك كرایەوە

بۆ یەكەمین جار پێشانگای 'نەوت و غاز و وزە'-ی نێودەوڵەوتی لە كەركوك كرایەوە و چەندین کۆمپانیای ناوخۆیی و ئەوروپی بەشدارن تێیدا.


بە بەشداری ٤٨ كۆمپانیای ناوخۆیی و نێودەوڵەتی، ئەمڕۆ یەكەمین پێشانگای نێودەوڵەتی نەوت و غاز و وزە لە هۆڵی ڕۆشنبیریی كەركوك كرایەوەو بڕیارە ماوەی دوو ڕۆژ بخایەنێت.

ئارێز فریس كرێس سەرپەرشتیاری پێشانگاكە بە ڕۆژنیوزی وت، جگە لە کۆمپانیاکانی ناوخۆ، کۆمپانیای سویدی و هەنگاری-ش بەرهەمەكانیان نمایش دەكەن، پێشانگاکەش ڕاستەوخۆ لەلایەن وەزارەتی نەوت و وەزارەتی كارەبای عێراقەوە سەرپەرشتی دەكرێت.

لە کاتی کردنەوەی پێشانگاکەدا، ڕاكان جبوری پارێزگاری بەوەکالەتی کەرکوک لە كۆنگرەیەكی ڕۆژنامەوانیدا، وتی: وەزارەتی نەوت و كارەبای عێراق كار لەسەر بنیاتنانی كەركوك دەكەن لە ڕێگای وزە و نەوت و غازەوە، كە چەندین كۆمپانیا لە خۆ دەگرێت لە دەرەوە و ناوەوەی وڵات، ئەو پێشانگایەی ئەمڕۆ وەك یەكەم هەنگاوی كارەكەیە، ئەم كۆنگرەیە هەلێكی باشە بۆ ئەوەی كۆمپانیاكان بێنە كەركوك و كار بكەن.

س.ح