ڕۆژنیوز- بەغدا
ئابووریناسێكی عێراقیی ئاشكرای دەكات، کشانەوەی کۆمپانیاکانی بواری نەوت لە هەرێمی کوردستان دەبێتە هۆی زیانی دارایی بۆ هەرێم و كێشە بۆ دابەشکردنی مووچەش دروست دەكات.
دوای ئەوەی ناوەڕاستی مانگی شوباتی ئەمساڵ، دادگای باڵای فیدراڵیی عێراق یاسای نەوت و گازی هەرێم بەپێچەوانەی دەستوور لە قەڵەمدا و فرۆشتنی نەوتی لەلایەن هەرێمەوە بە نادەستووری ناوبرد و حكومەتی عێراقیش پابەندبوونی خۆی بە جێبەجێكردنی بڕیارەكانی دادگای فیدراڵییەوە دەربڕی، كۆمپانیا بیانییەكانی بواری نەوت لە هەرێم دەستیان بە كشانەوەكرد.
لەماوەی مانگی ڕابردوودا، سێ كۆمپانیای بواری نەوت لە هەرێمی كوردستان كشاونەتەوە و پێشبینی دەكرێت ژمارەی ئەو كۆمپانیایانەی كارەكانیان ڕادەگرن و دەكشێنەوە زیاتر ببێت.
لەوبارەیەوە، عەبدولئەمیر مەیالی، ئابووریناسی عێراقیی بە ڕۆژنیوزی وت: قەبارەی بەرهەمهێنانی نەوت لە هەرێمی کوردستان ٥٠٠ هەزار بەرمیلە و ڕێژەی مانگانەی ١٥ ملیۆن بەرمیلە، بەهای خەمڵێنراو بۆ هەر بەرمیلێک ١٠٠ دۆلارە و داهاتی مانگانەی ملیارێك و ٥٠٠ ملیۆن دۆلارە.
ئەو ئابووریناسە وتیشی: بەردەوامبوونی پاشەکشەی کۆمپانیاکان بەتایبەتی کۆمپانیا سەرەکییەکان لە ئەنجامی بڕیاری وەزارەتی نەوتی فیدراڵ، دەبێتە هۆی کەمبوونەوەی بەرهەمی نەوت لە هەرێمدا، ئەمەش دەبێتەهۆی كەمبوونەوەی داهات و خراپبوونی زیاتری بارودۆخی هەرێم لە ڕووی بژێوییەوە و مووچەی کەرتی گشتی.
س.س
