سەرۆکى فراکسیۆنى یەکگرتوو لە پەرلەمانى هەرێم ڕایدەگەیەنێت، هۆکارى ڕێكنەكەوتنی نێوان هەرێم و بەغدا ئەوەیە، كە نەوتی هەرێم لە دەستی گروپێكدایە بە ئاسانیی لە دەستیان دەرنایەت، ئەو هەنگاوانەش ئاشکرا دەکات، کە بەغدا لەو دۆسیەدا لەبەرامبەر هەرێم دەیگرێتە بەر.
شێركۆ جەودەت، سەرۆكی فراكسیۆنی یەكگرتوو لە پەرلەمانی هەرێمى كوردستان، ئەمڕۆ لە کۆنگرەیەکى ڕۆژنامەنووسییدا لە شارى هەولێر لەبارەى دۆخى هەرێمى کوردستان دوا.
لە سەرەتاى قسەکانیدا سەرۆکى فراکسیۆنى یەکگرتووى ئیسلامى لە پەرلەمانى هەرێمى کوردستان وتی: ڕەوشی هەرێمی كوردستان بەرەو خراپیى دەچێت، چونکە پەكخستنی پەرلەمان و ڕێكنەكەوتنی هەولێر و بەغدا لەسەر پرسى نەوت و غاز، هەروەها، دەستبردن بۆ پارەى بانکەکان دۆخەکە بەرەو مەترسیی زیاتر دەبات.
ئەو ئەندامەى پەرلەمانى هەرێم وتیشى: ئێستا كاتی ئەوەیە هەمووان پێكەوە بە دەسەڵات بڵێین: بوەستن، چونکە هۆکارى ڕێكنەكەوتنی نێوان هەرێم و بەغدا ئەوەیە، كە نەوتی هەرێم لە دەستی گروپێكدایە بە ئاسانیی لە دەستیان دەرنایەت.
شێرکۆ جەودەت، سەبارەت بە هەڵبژاردنی پەرلەمانی هەرێمى كوردستان ئاماژەى بەوەکرد: ئێمە لەگەڵ هەڵبژاردنەكانین لەكاتی خۆیدا، بەڵام پارتی و یەكێتی بە پەكخستنی پەرلەمان و كارانەكردنەوەی كۆمسیۆنی هەڵبژاردنەكان و هەموارنەكردنەوەی یاسای هەڵبژاردنەكان، نایانەوێت هەڵبژاردن ئەنجام بدرێت.
ئەو پەرلەمانتارە وتیشى: لەئێستادا بەهۆى ململانێیى نێوان یەکێتى و پارتى پەرلەمانى هەرێمى کوردستان لە ئاست بوونى ئەو هەموو قەیرانە جۆراوجۆرە لە ناوچەکەمان پەکخراوە، بەجۆرێک دۆخى مووچەخۆران و دابینکردنى خزمەتگوزارییەکان لە لوتکەى خراپیدایە و هۆکارى ئەو دۆخەش یەکێتى و پارتین.
شێرکۆ جەودەت ئەوەشى خستەڕوو: لە ئێستادا سەبارەت بە پرسى نەوت و غاز بەغدا هەنگاوى قورس دژى هەرێم دەنرێت، چونکە قۆناغى گفتوگۆ تێپەریووە و سەرۆکایەتى ئەنجومەنى وەزیرانى هەرێم، کە لە یەکێتى و پارتى پێکدێن نایانەوێت لەگەڵ بەغدا ڕێکبکەون و ئەو ڕێکنەکەوتنەش دەر ئەنجامى خۆى دەبێت.
لەبارەى ئەو هەنگاوانەى بەغدا دژى هەرێم دەیگرێتە بەر ئەندامەکەى پەرلەمانى هەرێم ڕایگەیاند: فشار خستنە سەر ئەو کۆمپانیانەى، کە لە بوارى نەوتى هەرێم کاردەکەن و فشارخستنە سەر وڵاتانى دراوسێ بە مەبەستى ڕێگریى هەناردەى نەوت و ڕێککەوتنى نەوتى هەرێم و تورکیا لەبارەى هەناردەى نەوت بە خاکى ئەو وڵاتەدا، ئەو ڕێگایانە دەبن بەغدا دژى هەرێم دەیگرێتە بەر و دواتریش هەنگاوى سیاسى و سەربازى بەداوادا دێت.
ئ.م
