وەزارەتی بازرگانی عێراق بڕیاریدا بە خەرجکردنی نیوەی پارەی فەوتاوی گەنمی جوتیارانی هەرێمی کوردستان بۆ ساڵانی (۲٠۱٤_۲٠۱٥_۲٠۱٦).
کەمال موسلیم وەزیری بازرگانی هەرێم لە لێدوانێکدا ڕایگەیاندووە، دوای هەوڵێکی زۆری هەرێم، ئەمڕۆ وەزارەتی بازرگانی عێراق چەکێکی ٢٦٨ ملیار دیناری تایبەت بە پارەی گەنمی جوتیاران رەوانەی هەرێم دەکات و ئەوانیش بەزووترین کات دەست بە دابەشکردنی دەکەن.
بەوتە کەمال موسلیم، هەرکارێک پارەکە گەیشتە دەستیان، بەسەر هەموو جوتیاراندا دابەشی دەکەن و هەر جوتیارێک نیوەی فەوتاوەکەی بەردەکەوێت، باسی لەوەشکرد کۆی گشتی پارە فەوتاوەکە بۆ ئەو سێ ساڵە ٥٥٧ ملیار و ٧٥٥ ملیۆن دینارە.
بەوتەی بێگەرد تاڵەبانی، ئەم بڕیارەی وەزارەتی بازرگانی عێراق لە میانی پێداگری و پێشکەشکردنی راسپاردە و کۆبونەوەی شاندی باڵای کشتوکاڵ لە مانگی رابردوو لەگەڵ هەریەک لە سەرۆک کۆماری عێراق و جێگری سەرۆکی ئەنجومەنی نوێنەرانی عێراق و لێژنەی کشتوکاڵ و ئاودێری لە ئەنجومەنی نوێنەران و وەزارەتەکانی بازرگانی و کشتوکاڵ و سەرچاوەکانی ئاوی عێراق، چۆتە بواری جێبەجێکردن و خەرجکردنەوە.
ی. ک
