ئەندامێكی لیژنەی دارایی پەرلەمانی هەرێمی كوردستان ڕایدەگەیەنێت، هەموو ئاماژەكان ئەوە ئاشكرا دەكەن، كە حكومەتی هەرێم ئیفلاسی كردووە و بۆ پاڵپشتی قسەكانی ١٠ خاڵی ڕیزكردووە و وەك خۆی دەڵێت، بەڵگەی ئیفلاسیی حكومەتە.
عومەر گوڵپی، ئەندامی لیژنەی دارایی پەرلەمانی هەرێمی كوردستان دەڵێت: سەرەڕای داهاتی زۆری کوردستان بەهۆی بەرزبوونەوەی بەردەوامی نرخی نەوت و بەردەوام زیادبوونی داهات لە سەرچاوەکانی گومرگ و باج و ڕسوماتەوە، بەڵام بێجگە لە “ئیفلاس” دۆخی دارایی حکومەتی هەرێم هیچ پێناسەیەکی دیکە هەڵناگرێت.
ئەو پەرلەمانتارە لە پەیجی خۆی لە فەیسبووک ئەو هێمایانەی خستووەتە ڕوو، کە نیشانەی مایەپوچ بوونە و نووسیویەتی: حکومەت توانای خەرجکردنی مووچەی مووچەخۆرانی نیە بە پێی کات و بەرنامەیەکی ڕێک‌وپێکی مانگانە، کە متمانە لای مووچەخۆران دروست بکات، هەروەها ببێتە هۆی سەقامیگریی بازاڕو پاراستنی هاوسەنگییەکەی.
عومەر گوڵپی، ڕایگەیاندووە”حکومەت تا ئێستا نزیکەی (٢١ ترلیۆن دینار) قەرزاری مووچەخۆرانەو تا ئێستا هیچ بەرنامەو پلانێکی نیە بۆ گەڕاندنەوەی ئەو قەرزانە! بۆ هاووڵاتیان، ئەمە بێجگە لە چەند ترلیۆن دینارێک قەرزی تر کە نە بڕەکەی نەهۆکاری قەرزەکە دیارنییە، ئەوەش بەهۆی بەکارهێنانی پارەی بانکە ئەهلیەکان و پارەی هاووڵاتیان و صندوقە جۆراو جۆرەکان، بەبێ هیچ پشتیوانیەکی یاسایی و هیچ پلان و بەرنامەیەک بۆ گەڕاندنەوەیان”.
دەشڵێت: حکومەت نزیکەی (یەک ملیار دۆلار) قەرزاری بەڵێندەرانەو تا ئێستا هیچ بەرنامەیەکی نیە بۆ گەڕاندنەوەی ئەو پارانە کە مافی یاسایی‌‌و شەرعی خۆیانەو لەماوەی شەش ساڵی ڕابردوودا سەدان بەڵێندەر بەو هۆیەوە تووشی قەرزاری‌‌و کێشەی کۆمەڵایەتی بوون بەهۆی دەستبەسەراگرتنی پارەکانیان لەلایەن حکومەتەوە.
باس لەوەش دەكات، بە بڕیارێکی ئەنجومەنی وەزیران، زیاتر لە شەش ساڵە پلە بەرزکردنەوەی فەرمانبەران ڕاگیراوە، بەو بڕیارەش مانگانە لەنێوان (٦٠ تا ٣٠٠ هەزار دینار) زیان بە فەرمانبەرانی شارستانی دەکەوێت.
ئاشكرای دەكات، بانکەکان یەک دیناریان تێدا نیە و هیچ پشتیوانیەکی دارایی بۆ هیچ چین و توێژو سێکتەرێک بوونی نیە دەڵێت: لەکاتێکدا نەبوونی پشتیوانی بەشێوەی مینحە یان قەرز بۆ جوتیاران و بازرگانان و پیشەوەران و گەنجانی بێکار، دۆخی دارایی و ئابوری هەرێمی کوردستان بەرەو خراپتربوون دەبات.
هەروەها، زیاتر لە ٢٠ هەزارفەرمانبەری گرێبەست چاوەرێن بڕیاری بە هەمیشەییکردنی ڕاژەکانیان بدرێت، کە بەپێی بنەما دەستوریی و یاسایییەکان و ڕێنماییەکانی حکومەت خۆشی دەبوو دوای سێ ساڵ لە کارکردن بکرێنە هەمیشیەیی، بەڵام هیچ بەرچاوڕوونیەک تا ئێستا بۆ بەهەمیشەییکردنیان نیە.
جگەلەوەش، زیاتر لە ٦٠٠ هەزار هاوڵاتی بێکارن کە نزیکەی ٤٠٠ هەزاریان گەنجانی تەمەن ١٦ بۆ ٢٤ساڵن، لەناو ئەو بێکارانەشدا زیاتر لە ٢٠ ەزار گەنج بەناونیشانی مامۆستای وانەبێژ (کە لە هیچ یاسایەکدا ناونیشانی کارکردنی لەمجۆرە بوونی نیە) ناچاری کارکردنن لە دۆخێکی خراپی بژێوی و کەم و کورتی لە مافدا، حکومەتیش هیچ بەرنامەو پلانێکی نیە بۆ ڕزگارکردنی هاووڵاتیانی بێکار بەتایبەت گەنجان لەو دۆخەی تیایدان!
گوڵپی وتیشی: بە بەهای نزیکەی پێنج ملیار دۆلار نزیکەی سێ هەزار و ٥٠٠ پڕۆژەی جۆراو جۆر وەستاون، بەشێک لەو پڕۆژانەش بەهۆی وازلێهێنانیان زیانی گەورەیان بەرکەوتووە کە بە ملیۆنەها دۆلار دەخەمڵێنرێت، حکومەتیش هیچ پلان‌و بەرنامەیەکی نیە بۆ بەگەڕخستنەوەی ئەو پڕۆژانەو پێشکەشکردنی خزمەتگوزاریی بە هاووڵاتیان.
“لەماوەی دە ساڵی ڕابردوودا، دەیان و سەدان کۆڵان و گەڕەکی نوێ لە شارو شارۆچکەکان دروست بوون کە بەدەست کێشەکانی نەبوونی ڕێگاوبان‌و ئاوی خواردنەوەو ئاوەڕۆو نەخۆشخانەو قوتابخانەو سەوزایی و کەمی خزمەتگوزاریی دەناڵێنن، حکومەتیش هیچ بەرنامەو پلانێکی نیە بۆ وەڵامدانەوەی داوای ئەو هاووڵاتیانە لەو گەڕەک و کۆڵانە نوێیانەو کۆتایهێنان بە چاوەڕوانیان” عومەر گوڵپی وای وت.
ئەوەشی نوسیووە، حکومەت یاسای بودجەی نیە، هەروەها هیچ شەفافیەتێکیشی لە داهات‌و خەرجیەکانی نیەو هیچ کەس نازانێت بەرنامەو پلانی بۆ هەر ساڵێکی دارایی بۆ سێکتەرو بوارە جیاجیاکان و ژیانی خەڵک چیە؟
دەشڵێت: لە بەرانبەر ئەم دۆخە داراییەی حکومەتدا، حزبەکانی دەسەڵات ڕۆژ بە ڕۆژ زیاتر دەوڵەمەند دەبن، ئاشکراتر لەڕێگەی کۆمپانیاکانیانەوە داهات بۆ خۆیان کۆ دەکەنەوە، بەڕێگەو شێوازی جۆراو جۆر زیاتر دەست بەسەر زەوی نایاب لەشارەکان دەگرن و زیاتر تەنگ بە سەرمایەدارە ڕاستەقینەکان هەڵدەچنن بۆ پشکی خۆیان، بەجۆرێک بە پێی زانیارییەکان لەماوەی ساڵێکی ڕابردوودا ژمارەیەک سەرمایەداری کورد ڕوویان لە بەغداو شارەکانی ناوەڕاست و خوارووی عێراق کردووە بۆ کاری بازرگانی و وەبەرهێنان، چونکە پێیان وایە ئەوێ شوێنێکی باشترە بۆ بەگەڕخستنی سەرمایەکانیان، ئەمەش سەرەتای مەترسییەکی گەورەیە کە هەڵهاتنی سەرمایەدارەکانە، ئەم دیاردەیەش خراپتربوونی دۆخی بێکاریی و جوڵەی بازاڕ لە هەرێمی کوردستان بەدوای خۆیدا دەهێنێت.
س.س
