وەزیرى نەوتى عێراق ڕایگەیاند، هیچ جۆرە پێشنیازێکى حکومەتى هەرێمى کوردستانمان بە مەبەستى دامەزراندنی دوو کۆمپانیای نەوت لە هەرێم بۆ دۆزینەوە و بەبازاڕکردنى نەوت پێنەگشتووە، دەشڵێت: هەرکات پێمان گەشت داواکە ئەوا لێکۆڵینەوەى لەسەر دەکەین و دواتر وەڵامى فەرمیمان دەبێت.
ئەمڕۆ، ئیحسان عەبدولجەبار وەزیری نەوتی عێراق لەلێدوانێکی ڕۆژنامەوانییدا ڕایگەیاند: هیچ جۆرە پێشنیازێکى حکومەتى هەرێمى کوردستانمانمان بە مەەبەستى دامەزراندنی دوو کۆمپانیای نەوت لە هەرێم بۆ دۆزینەوە و بەبازاڕکردنى نەوت پێنەگشتووە.
وەزیرى نەوتى عێراق ڕاشیگەیاندووە: هەرکاتیش داوایەکى لەوشێوەیەمان پێگەشت ئەوا لێکۆڵینەوەى لەسەر دەکەین بزانین ئایا یاسایی و دەستورین و لەچوارچێوەى بریارەکانى دادگای فیدڕاڵیدان یان لەگەڵ دەسەڵاتەکانی فیدڕاڵی عێراق دەگونجێن لەپاش ئەوەش وەڵامى فەرمیمان دەبێت.
لە ڕۆژى ١٢ ى مانگى ڕابردوو وەزارەتی نەوتی عێراق لەبارەی هەناردەکردنی نەوتی هەرێمی کوردستان ڕایگەیاند، هەر هەرێمێک سەربەخۆ گرێبەستی نەوتی لەگەڵ کۆمپانیا جیهانییەکان بکات بۆ هەناردەکردنی نەوت و غاز، پێچەوانەی دەستوورە و داواى یاسایی لەسەر ئەو کۆمپانیا نەوتیانە تۆمار دەکرێت.
لە ڕۆژى ٧ ى ئەم مانگەدا حکومەتى هەرێمى کوردستان بڵاویکردەوە، كۆمپانیای كوردستان – KROC ى تایبه‌ت به بواری دۆزینه‌وه و ده‌رهێنان و به‌رهه‌مهێنانی نه‌وت و غاز، هەروەها، كۆمپانیای كوردستان – KOMO بۆ به‌بازاڕكردنی نه‌وتى هەرێم داده‌مه‌زرێنن ده‌كرێت ئه‌و دوو كۆمپانیایه هەماهەنگییان لەگەڵ کۆمپانیاى سۆمۆ و وەزارەتى نەوتى عێراق هەبێت.
لە ڕۆژى ١٥ ى ئەم مانگەدا كۆمپانیای نیشتمانی نەوتی عێراق بڵاویکردەوە، ئەو كۆمپانیایانەى لەبوارى نەوتى هەرێم کاردەکەن دەبێت لەماوەی سێ مانگدا كۆتایی بە كاركردنیان بهێنن، دەشڵێن: ئەگەر ئەو كۆمپانیانەی لە كێڵگە نەوتیەكانی هەرێم كاردەكەن پابەند نەبن ئەوا لەلایەن دەخرێنە لیستی ڕەشەوە و نابێت كاریان لەگەڵدا بكرێت.
ڕۆژى ١٨ ى ئەم مانگە عەلى عەلاوى وەزیری دارایی عێراق، ڕایگەیاند: بڕیارەکەى دادگای باڵای فیدراڵی تایبەت بە ھەڵوەشاندنەوەی یاسای نەوت و غازی ھەرێم، ڕێگرە لە حکومەتی فیدراڵ، کە بەشە بودجەى هەرێم لە بودجەى گشتى عێراق دیاری بکات، دەشڵێت: ناردنی ٢٠٠ ملیار دینارەكە بۆ هەرێم بەردەوام نابێت.
لە هەرێمى کوردستان ٥٧ بلۆکى نەوت و گاز هەیە ٢٨ کۆمپانیا کاری تێدا دەکەن، بەجۆرێک لە سنوورى هەولێر و ١٢ کۆمپانیاى هەشت وڵاتى جیاوازى بیانى و کۆمپانیایەکى خۆماڵیی کاری تێدا دەکەن و لە سلێمانى، هەڵەبجە و گەرمیان ١٥ کۆمپانیاى نۆ وڵاتى بیانیی کار لەو کێڵگە غازیى و نەوتیانەدا دەکەن.
ئ.م
