سەرۆكی لیژنەی وزە و سامانەسروشتییەكان لە پەرلەمانی هەرێمی كوردستان باس لەوە دەكات، نەوت هیچ ئاندەیەكی گەشی پێنییە بۆ خەڵك و پێیوایە، سامانی غازی سروشتی ئایندەیەکی گەشی پێیە.
عەلی حەمەساڵح، سەرۆكی لیژنەی وزە و سامانەسروشتییەكان لە پەرلەمانی هەرێمی كوردستان لە پەیجی خۆی نوسیویەتی: دڵنیام لەوەی نەوت ھیچ ئایندەیەکی گەشی پێنیە بۆ خەڵکی کوردستان، ئەگەر پلانێکی تۆکمە ھەبێت، غازی سروشتیی نەک چارەسەری گرفتی غاز و کارەبا، بەڵکو ئایندەیەکی گەشی پێیە بۆ کوردستان.
دەشڵێت: بەپێی داتای فەرمی وەزارەتی سامانە سروشتییەکان یەدەکی غازی ھەرێمی كوردستان (٥.٦ ترلیۆن پێ سێجایە)، ئەگەر ئەم داتا دروست بێت، ھەرێم لە یەدەکی غازی سروشتی دەکەوێتە دوای سعودیە.
سەرۆكی لیژنەی وزە و سامانەسروشتییەكان ئەوەشی خستووەتەڕوو، پرسیاری جدیی ئەوەیە ڕوئیای ھەرێمی کوردستان بۆ ئەم سامانە سروشتییە چیە؟ نەک خەڵک گرفتی بوتڵێک غازی ھەبێت.
ئاماژەی بەوەشكردووە، وەبەرھێنان لە غازی سروشتی بەراورد بە نەوت کاتی زۆر زۆر دەوێت، بەڵام بەراورد بە نەوت کەمترین پلان بۆ وەبەرھێنان ھەیە.
س.س
