بریندارانى بەرکەوتەى چەکى کیمایی لە هەڵەبجە، لەبارەى بڕینى مینحەکانیان گردبوونەوە و سەرۆکى كۆمەڵەی قوربانیانی كیمیابارانی هەڵەبجەش، ڕایگەیاند: پرۆژە یاساكە لە پەڕلەمان دەرچووە، ئێستا حكومەت قۆناغ بە قۆناغ جێبەجێیدەكات ئەگەر نا خۆپیشاندانى سەرتاسەریى ئەنجام دەدەین.
ئەمڕۆ بریندارانی بەرکەوتەى چەكی كیمیایی و كۆمەڵەی قوربانیانی كیمیابارانی هەڵەبجە، لەسەر بڕینی مینحەکانیان لەبەردەم نەخۆشخانەی كیمیابارانکراوانى هەڵەبجە گردبوونەوە و تێیدا لوقمان عەبدولقادر، سەرۆكی كۆمەڵەیی قوربانیانی كیمیابارانی هەڵەبجە بەیاننامەیەکى خوێندەوە.
لە سەرەتاى قسەکانیدا سەرۆكی كۆمەڵەی قوربانیانی كیمیابارانی هەڵەبجە وتى: ئێمە پەیامێك ئاڕاستەی سەرۆكایەتی ئەنجومەنى وەزیران و لایەنە پەیوەندییدارەكان دەكەین، بەمەبەستی پێداچوونەوە بەو پرۆژە یاسای چاکسازییەی، کە لە پەرلەمانی هەرێمى كوردستان دەرچووە.
لوقمان عەبدولقادر وتیشى: بەداخەوە بەبێ ئەوەی ڕەچاوی ژیان و بارودۆخی قوربانیانی كیمیاباران بكرێت، پرۆژە یاساكە لە پەڕلەمان دەرچووە و لەئێستاشدا حكومەت قۆناغ بەقۆناغ جێبەجێیدەكات.
سەرۆكی كۆمەڵەی قوربانیانی كیمیابارانی هەڵەبجە ڕاشیگەیاند: ئەو بەركەوتوانەى چەکى کیمایی، کە مامۆستا و فەرمانبەرن بەپێیى ئەو پرۆژە یاسایە مینحەكانیان دەبرێت، هەربۆیە وەك بەركەوتوانی كیمیاباران داوا لەسەرۆكی حكومەت و جێگرەكەی دەكەین ڕەچاوی داواكارییەکانمان بکەن.
لوقمان عەبدولقادر باسی لەوەشکرد: داواکارین ئەو پڕۆژە یاسایە جێبەجێنەكرێت بۆ ئەوەى بگەڕێندرێتەوە پەرلەمانى هەرێم و ئەو بڕگەى تایبەت بە ئێمى هەموار بکرێتەوە، چونكە ڕێزگرتن لە قوربانیان بەو جۆرە نابێت.
سەرۆكی كۆمەڵەی قوربانیانی كیمیابارانی هەڵەبجە ئەوەشى خستەڕوو: ئەو بەرکەوتوانەى چەکى کیمایی، کە مامۆستا و فەرمانبەرن ناتوانن موچەکانى خۆیان بەكاربێنن بۆ مەبەستى چارەسەرکردنى خۆیان.
لوقمان عەبدولقادر دەشڵێت: داواکارین لە ئەنجومەنى وەزیران و لایەنە پەیوەندیارەكان، کە بەدەم داواكارییەكەمانەوە بێن ئەگەر نا ناچار دەبین لەبەردەم سەرۆكایەتی ئەنجومەنی وەزیران ناڕەزایەتی دەرببڕین و خۆیشانادنى سەرتاسەرى ئەنجام بدەین.
لە کۆتایى قسەکانیدا سەرۆكی كۆمەڵەی قوربانیانی كیمیابارانی هەڵەبجە وتى: دەبێت قوربانیانی كیمیاباران لەم نەهامەتیەى ئێستا تێیدان ڕزگار بكرێن، چونکە ناكرێت قوربانیانی كیمیاباران سەرفترە و زەكاتیان پێبدرێت.
بەپێی پرۆژە یاساى چاکسازیى، کە لەپەرلەمانى هەریمى کوردستان دەرچووە، بریندارانی بەرکەوتەى چەكی كیمیایی موچەیی یەك ساڵیان لێوەردەگێرێتەوە، پێشتر وەریانگرتووە و چیتریش مینحەکانیان پێنادرێت.
ئ.م
