ئەمڕۆ وەزیری کارەبای هەرێم سەردانی پارێزگای سلێمانی کرد و ڕایگەیاند تا مانگی چوار کارەبای هەرێم بەتەواوەتی دەکەوێتە دەستی کەرتی تایبەت، هەروەها زیادبوونی نرخی کارەبای لەسەر هاوڵاتییان گەڕاندەوە بۆ بەرزبوونەوەی نرخی دۆلار و ئاماژەی بەوەشدا ناچارن کارەبا لە تورکیا بکڕن.
ئەمڕۆ کەمال محەمەد، وەزیری کارەبای حکومەتی هەرێمی کوردستان، سەردانی پارێزگاری سلێمانی کرد و لە دیوانی پارێزگای سلێمانی، لەگەڵ هەڤاڵ ئەبوبەکر پارێزگاری سلێمانی كۆنگرەیەکی رۆژنامەوانییان ئەنجامدا.
لە کۆنگرە ڕۆژنامەوانییەکەدا کەمال محەمەد لەبارەی زیادبوونی نرخی کارەبا لەسەر خەڵک وتی: ئێمە پارەی کارەبامان زیادنەکردووە، بەڵکو بەرزبوونەوەی نرخی دۆلار پارەی کارەبای زیادکردوە لەسەر هاوڵاتیان، کە حکومەتی عێراق و بانکی ناوەندی لێی بەرپرسیارن، پارەی ئێمە دینارە و هەموو ئە کەرەستە و پرۆژانەی کە پەیوەندییان بە کارەباوە هەیە مامەڵەیان بە دۆلارە، هەرکات بانکی ناوەندی نرخی دۆلاری دابەزاند ئێمەش بڕیارێک دەردەکەین لەو بارەیەوە.
هەوەها ڕایگەیاند، لەئێستادا ٨٤٪ بەرهەمهێنانی کارەبای هەرێم لە دەستی کەرتی تایبەتدایە، تا مانگی چواری ئەمساڵ کارەبا بەتەواوەتی دەکەوێتە دەستی کەرتی تایبەت، وتیشی:”هاوڵاتیان دڵنیادەکەینەوە، کە لە قازانجی ئەوانە و لە ڕێاگی دانانی پێوەرەوە بەفیڕۆچوونی کارەبا نامێنێت و بەڵین دەدەین لە ١٧کاتژمێر زیاتر کارەبا دەدەین بە خەڵک”.
لە کۆتاییشدا لە وەڵامی پرسیاری ڕۆژنیوز سەبارەت بەوەی هەرێم بۆچی کارەبا لە تورکیا دەکڕێت لەکاتێکدا بەو پارەیە دەتوانێت خۆی کارەبا لە ناوخۆدا بەرهەم بهێنێت، وەزیری کارەبا خۆی لە بابەتەکە دزییەوە و وتی: ئێمە ناچارین بڕی ١٥٠ مێگاوات کارەبا لە تورکیا بکڕین تا ئەوکاتەی بۆری غازی سروشتی دەگاتە وێستگەکانی کارەبا، تا ئێستا بۆری غازی نێوان دهۆک و هەولێر و سلێمانی دروستنەکراوە، چونکە وەحدەی پێویستمان نییە.
ش.ف
