١٨ ملیار بۆ بازاڕی هەڵەبجە تەرخانکرابوو، بۆ شتێکی دیکە خەرجکرا

چوؤرشەممە, 27 ماي 2020 – 07:32  ڕۆژنیوز – هەرێم قادر

کاتێک لە وێنە کۆنەکاندا سەیری بازاڕی شاری هەڵەبجە دەکەیت و لە ئێستای بازاڕەکەش دەڕوانی، چەند گۆڕانکارییەکی بچوک نەبێت هیچی دیکە بەدی ناکەیت و بازاڕەکە وەک شیوەی ٥٠ بۆ ٦٠ ساڵ لەمەوپێشی ماوەتەوە، ئەوەش گرفتی بۆ هاوڵاتیان و کاسبکاران دروستکردووە، چونکە ژمارەی دانیشتوانی هەڵەبجە زۆر زیادی کردووە و بازاڕەکە لەوە بچوکتر و کۆنترە، کە بازاڕی پارێزگایەک بێت.

نادر هەڵەبجەیی كاسبكارێكی ناو بازاڕی هەڵەبجەیە بۆ ڕۆژنیوز وتی: ئەم بازاڕەی من چەندین ساڵە كاری تێدا دەكەم، دیزاینەكەی هی ساڵی ٥٠ کانی سەدەی ڕابردووە، لەسەرەتای ساڵی ١٩٨٠ وتیان ئەم بازاڕ و كۆڵانانە چاكدەكرێت و فراوان دەكرێت، كەچی شەڕی عێراق و ئێران دەستیپێكرد و نەكرا، دواتریش كیمیاباران و كۆڕە و شەڕی براكوژیی بەسەردا هات و دیسان هیچی بۆ نەكرا، لەدوای پرۆسەی ئازادیی عێراقیشەوە جارێكی دیكە وتیان فراوانی دەكەین هەر نەكرا.

ئەو کاسبکارە، ئاماژەی بە کەموکورتییەکانی بازاڕی هەڵەبجە کرد و وتی: جادەوبانی ناو بازاڕەكە زۆر تەسكبووە، هیچ مەرجێكی پارێزگای تێدا نییە، بەبیانووی شەڕی داعش و قەیرانی داراییەوە ناو بازاڕەكە چاك نەكرا، داواكارین شارەكە ئاوەدان بكرێتەوە ئەو پرۆژانەی وەستاوە تەواوی بكەن.

وەرزێر غەریب كاسبكارێكی دیكەی ناو بازاڕی هەڵەبجەیە و بۆ ڕۆژنیوز وتی: بازاڕی پارێزگای هەڵەبجە كێشە و گرفتی زۆری هەیە، ڕێگەوبانەکەی ناڕێكوپێكی زۆری پێوە دیارە، شارەوانیش وەك پێویست نایەت بەدەمیەوە بۆ چاکكردنی بەهۆی نەبوونی پارەوە.

وتیشی: ئەركی حكومەتە ناو بازاڕ ڕێكوپێك بكات، دوكاندارەكانیش خۆیان چاكی ناكەن، چونكە خەرجییەكی زۆر دەكەوێتە سەر شانیان، حكومەتیش زەبت و ڕەبتێكی وای نییە دیكۆرێكی جوان بۆ بازاڕەكە دروستبكات، جگە لەوەش بازاڕەكە هیچ پاركێكی وای تێدا نییە بۆ دانیشتنی هاوڵاتیانی شارەكە.

كوێستان ئەكرەم، سەرۆكی شارەوانی هەڵەبجە بۆ ڕۆژنیوز وتی: بۆ فراوانكردنی ناو شاری هەڵەبجە لەساڵی ٢٠١٣ دەرخستەی پێویست  ئامادەكرا بڕی ١٨ ملیار و ١٣٨ ملیۆن دینار بۆ تێكدان و دووبارە دروستكردنەوەی بازاڕی هەڵەبجە تەرخانکرا، کە بەو پارەیە دەبوو هەم بازاڕەکە بڕوخێندرێ و دروستبکرێتەوە هەم قەرەبووكردنەوەی خاوەن موڵكەكانی پێبکرێت.

وتیشی: گەشتینە ئەوەی هەستین بەجێبەجێكردنی پرۆژەكە هەموو ڕەزامەندییەكی لەسەر درا، بودجەشی بۆ دابینكرا، چەند جارێكیش لیژنە لەوەزارەتی شارەوانی و ئەنجومەنی وەزیرانەوە سەردانی ناو بازاڕی هەڵەبجەیان كرد، بڕیارەكە كەوتە بواری جێبەجێكردنەوە، گەشتینە ئەو بڕیارەی هەندێك خاوەن موڵك ئەو قەرەبووەی بۆیان دابینكرابوو بەكەمیان زانی ڕازی نەبوون، کەیسەکەمان بردە دادگا بۆ ئەوەی لەڕێگەی دادگاوە یەكلایی بكەینەوە، بەڵام قەیرانی دارایی و شەڕی داعشی بەسەردا هات، دواتریش چەند جارێك بەدواداچوونمان بۆ كردەوە، بەڵام بودجەكەی لەشەڕی داعشدا خەرجكرا، لەو كاتەشەوە باری دارایی حكومەتی هەرێم خراپتر بووە نەك باشتر، ئەوانەش هۆكارێك بوون بۆ ئەوەی پرۆژەكە جێبەجێنەكرێت.

د.ع