بڕیاردەری لیژنەی سامانەسروشتییەکانی پەرلەمانی هەرێمی کوردستان باس لەوە دەكات، بەرهەمی ڕۆژانەی غازی سلێمانی هەزار تۆنە و پێویستی هاوڵاتیان ٥٠٠ تۆنە، بەڵام كەمتر لە پێویستیان بۆ دابیندەكرێت و ئەوەی تری دەفرۆشرێت.
ماوەی چەند مانگێكە قەیرانی كەمبوونەوەی غازی ماڵان هەرێمی كوردستانی گرتووەتەوە، ئەوەش لەكاتێكدایە ئەو غازەی بەرهەم دەهێنرێت ئەگەر بدرێت بە هاوڵاتیان كێشەی كەمی غاز نامێنێت، بەڵام بەوتەی پەرلەمانتارێك بەشێكی زۆری ئەو غازە دەفرۆشرێت و نادرێت بە هاوڵاتیان، بۆیە قەیرانی كەمی غاز دروستبووە.
سەركۆ ئازاد گەڵاڵی، بڕیاردەری لیژنەی سامانەسروشتیەکانی پەرلەمانی هەرێمی كوردستان لە پەیجی خۆی نوسیوویەتی: دیسان پارێزگای سلێمانی لە قەیرانی نەبوونی غازدایە و هاوڵاتیان دوو ڕۆژە بەم سەرمایە لەسەرەی وەرگرتنی غاز بوون، بەڵام یەک بوتڵ غازیان دەست نەکەوتووە.
دەشڵێت: لەکاتێکدا بەرهەمهێنانی غازی هەزار تۆنی ڕۆژانەیە لەم پارێزگایەدا، بەڵام بۆ پارێزگای سلێمانی و پارێزگای هەڵەبجە و ئیدارەی ڕاپەڕین و گەرمیان ڕۆژانە تەنها ٢٣٠ تۆن دابین دەکرێت، دانەغاز و کۆمپانیایەکی ناوخۆی بڕی ٣٠٠ تۆن بە بازرگانیی دەفرۆشن و هەناردەی دەرەوەی دەکەن، لەکاتێکدا پێداویستیی ڕۆژانەی هەردوو پارێزگای سلێمانی و هەڵەبجە و ئیدارە سەربەخۆکان بریتیە لە ٥٠٠ تۆنی ڕۆژانە.
بڕیاردەری لیژنەی سامانەسروشتییەکانی پەرلەمانی هەرێمی کوردستان وتیشی: بڕی پێوست بۆ پارێزگای هەولێر کە ٢٧٠ تۆن ڕۆژانە و ١٧٠ تۆن ڕۆژانە بۆ پارێزگای دهۆک دابین دەکرێت.
ئاماژەش بەوەدەكات، ناکرێت هاوڵاتیان بەم سەرمایە لە سەرەی غاز بوەستن و ئیدارەی پارێزگای سلێمانی بیدەنگ بێت و دەڵێت: ئیمە لە لیژنەی سامانەسروشتیەکان هەموو ڕێکاریکی پەیڕەوی و پەرلەمانی دەکەین بۆ فشار خستنە سەر وەزارەتی سامانەسروشتییەکان بۆ دابینکردنی غازی پێوست بۆ هاوڵاتیان .
س.س
