ئەندامێکی لیژنەی دارایی لەپەرلەمانی عێراق ڕایدەگەیەنێت، بڕیارەکەی دادگای فیدڕاڵی بۆ هەڵوەشاندنەوەی ئەو بڕیارانەی بۆ ناردنی پارە بۆ هەرێم دراون ڕێگر نییە لە بەردەم ناردنی ئەو ٤٠٠ ملیار دینارەکەی هەرێمی کوردستان.
د.نەرمین مەعروف، ئەندامی لیژنەی دارایی لە ئەنجوومەنی نوێنەرانی عێراق بەمیدیاکانی یەنەکەی ڕاگەیاند: بڕیارەکەی دادگای فیدڕاڵی بۆ هەڵوەشاندنەوەی ئەو بڕیارانەی بۆ ناردنی پارە بۆ هەرێم دراون ڕێگر نییە لە بەردەم ناردنی ئەو ٤٠٠ ملیار دینارەی لەم دواییەدا بڕیاری لەبارەوە درا بۆ هەرێمی کوردستان بنێردرێت.
ئاماژەى بەوەشکردوە، ئەو پارەیە ناوی قەرزی لێ هێندراوە و بانکێک دەیدات بە هەرێمی کوردستان.
هەروەها ئەندامەکەى لیژنەى دارایی پەرلەمانى عێراق دەشڵێت” بابەتەکەش پەیوەندیی بە داهاتووی ڕێککەوتنی هەرێم و بەغداوە هەیە نەک ڕابردوو، واتە ئەو ٤٠٠ ملیارە دەخرێتە ئەو ڕێککەوتنەوە کە هەرێم و بەغدا لەسەر بوودجەی ٢٠٢٣ـی عێراق ئەنجامی دەدەن”.
ئەمڕۆ چوار شەممە دادگای فیدراڵی عێراق لەسەر سکاڵای پەرلەمانتارێک بڕیاریدا کە ناردنى ٢٠٠ ملیار مانگانە بۆ هەرێمی کوردستان نادەستوری و نا یاسایییەوە، بەوەش دەرگای بەسەر ناردنى ٢٠٠ ملیارەکەى هەرێم داخست.
