ئەندامێكی ئەنجومەنی نوێنەرانی عێراق ڕایگەیاند، ڕۆژی سێشەممەی داهاتوو پرۆژە یاسای بودجەی ٢٠٢٣ دەگاتە پەرلەمان بە مەبەستى گفتوگۆكردن و دەنگدان لەسەر پرۆژە یاسای بودجە، دەشڵێت، حکومەتەکەى کازمى لە ئامادەکردنى پڕۆژە یاساى بودجە شکستى هێنابوو.
ڕەفیق ساڵحی، ئەندامی ئەنجومەنی نوێنەرانی عێراق، بە میدیا عێراقییەكانی ڕاگەیاندووە، كارەكانی پڕۆژە یاساى بودجە لەلایەن حكومەتەوە لە كۆتایی نزیكبوەتەوە و بڕیارە ڕۆژی سێشەمەی داهاتوو پرۆژە یاسای بودجەی ٢٠٢٣ ى عێراق پێشكەشى پەرلەمان بكرێت.
ئەو ئەندامەى ئەنجومەنى نوێنەرانى عێراق ئاماژەی بەوەشكرد، پشكی هەموو پارێزگا و وەزارەتەكان و پێداویستییەكانیان لەڕێگەی پڕۆژە یاساى بودجەوە دیاری دەكرێت.
ڕەفیق ساڵحی وتیشى، پێشتر حكومەتی كازمی شكستی هێنا بەهۆی ئەوەی نەیتوانی بودجە بۆ ساڵی ٢٠٢٢ ئامادە بكات، بەڵام حكومەتەكەی سودانی پرۆژە یاسای بودجەی ٢٠٢٣ی ئامادە كردوە.
جێگای ئاماژەیە، دوای دەستبەكاربوونی سودانی وەك سەرۆك وەزیرانی عێراق، وەزارەتی دارایی ڕاسپارد بۆ ئامادەكردنی پرۆژەیاسای بودجەی ٢٠٢٣، وەزارەتەكە ڕاستەوخۆ دەستی بەكارەكانی كرد بۆ ئامادەكردنی پرۆژە یاساكە و بڕیارە لەسەرەتای ساڵی داهاتوودا دەنگی لەسەر بدرێت.
هـ.ئ
