لە پێنجوێن، ئێستا کاتی پێگەیشتنی شوتییە و جوتیاران سەرقاڵی کۆکردنەوە و بەبازاڕکردنی بەرهەمەکانیانن، جوتیارانی سنوورەکە، دەڵین: بازاڕی شوتی زۆر باشە و ئەگەر شوتی هاوردەی هەرێم نەكرێت، پێنجوێن دەتوانێت بەشی كوردستان و زۆربەی عێراقیش بەرهەمی شوتی پڕ بكاتەوە، ئەوەش دەخەنە ڕوو کە هێشتا شوتی بە قاچاخ هاوردە دەکرێت.
بەهۆی ئەوەی ناوچەیەكی كوێستانی و فێنكە، جوتیارانی سنووری شارۆچکەی پێنجوێن لە پارێزگای سلێمانی، درەنگ تر بەرهەمەکانیان دەچێنن و لەمانگی شەشدا دەست دەكەن بەچاندنی تۆوی شوتی و لە مانگی ئابدا بەرهەمەكانیان پێدەگات، ئەو شوتیەشی لەناوچەكەدا دەكرێت تەنها جۆری بەڵەكە.
بەهۆی فێنكی ئاو هەوای ناوچەكەوە ئەو شووتیەی بەرهەم دێت تایبەتمەندی خۆی هەیە، بەجۆرێك تامێكی خۆش و شیرینی هەیە، هەروەها شوتیەكە لەكاتی باركردن و گواستنەوەی بەرگەی ڕێگەی دوور دەگرێت و تەپە نابێت (تێك ناچێت)، کۆکردنەوەی بەرهەمی شوتی زیاتر بەشەودا دەكرێت، بەهۆی ئەوەی شەو كەشوهەوا فێنكە و شوتیەكە خراپ نابێت لەكاتی باركردنەكەیدا و ئێستاش کاتی پێگەیشتنی شوتی پێنجوێنە و جوتیاران سەرقاڵی کۆکردنەوەی بەرهەمەکانیانن.
سەروەرت حەمەڕەشید، جوتیارێكی پێنجوێنە بۆ ڕۆژنیوز وتی، سوپاس بۆ خوا ئەمساڵ بازاڕی شوتی زۆر باشە، نرخی یەك كیلۆ شوتی لەنێوان ٣٥٠ بۆ ٤٥٠ دیناردایە، ئەو شوتیەشی لێرە هەیە زۆربەی بۆ ناوچەكانی ناوەڕاست و خواروی عێراق دەڕوات، بەشێكی كەمیشی لەناوخۆی كوردستاندا ساغ دەبێتەوە.
وتیشی: شوتی ئەمساڵ جوانە، بەڵام ڕێژەی كەمە، بۆ نمونە ئەگەر ساڵی ڕابردوو نەوارێك كەهەزار مەتر سۆندە دەكات ١٥ تۆن شوتی پێوە بووبێت ئەمساڵ ٨ تۆنی پێوەیە.
ئاسۆ محمود، جوتیارێكی دیكەیە سەرقاڵی ساغكردنەوەی شوتیەكەیبوو بۆ ڕۆژنیوز قسەیکرد، “ئێمە شوتیەكەمان لەم عەلوەیەدا ساغ دەكەینەوە، شوتیەكەشمان بەشێكی زۆریی كڕیاری عەرەب دەیكڕێت، ئەگەر شوتی هاوردە نەیەت بەرهەمی پێنجوێن پێداویستیەكانی ناوخۆیی كوردستان و عێراقیش دابین دەكات لەبەرهەمی شوتی.”
وتیشی، ئەمڕۆ شوتی بەقاچاخ لەئێرانەوە هاتووەتە هەرێمی كوردستانەوە، بەو هۆیەشەوە بازاڕی شكاوە شوتیەكەی ئێمە پارە ناكات.
ئازاد محەمەد، كاریی کۆکردنەوە و باركردنی شوتی دەكا، دەربارەی کارەکەی وتی: ئێمە ڕۆژانە لەگەڵ بانگی ئێوارەدا تاوەكو و بەیانی ڕۆژ دەبێتەوە خەریكی شوتی چنینین، بەشەو ئیشەكەمان دەكەین، چونكە شوتیەكە بەشەودا تەپە و خراپ نابێت، ئیشەكەشمان تەواو قورسە.
وتیشی، باركردنی شوتی ئۆتۆمبێلی پیكاب، لۆری و تڕێلە هەریەكەیان نرخێكی جیاواز باردەكەین، بوونی ئەم كارەش بۆ زۆربەی خەڵك و ئێمەش باشە هەموو كەسێك سودی لێوەردەگرێت بژێوی خۆمانی پێدابین دەكەین.
ڕۆژنیوز بۆ وەررگرتنی زانیاری لەسەر بڕو بەرهەمی شوتی ناوچەكە، پەیوەندیكرد بەهەریەك لەزانا ڕەحمان، قائیمقامی پێنجوێن، سامان كەریم، بەڕێوەبەری كشتوكاڵی پێنجوێن كەسیان زانیارییان لانەبوو، بەهۆی ئەوەی ساڵانە ڕووپێوی ناكرێت بۆ تەواوی ئەو بەرهەمانەی لەناوچەكەدا دەكرێت.
ک.س
