سەرۆكی فراكسیۆنی گۆڕان لە پەرلەمانی هەرێمی كوردستان بە گرنگی دەزانێت، سەرۆكایەتیی پەرلەمان لیژنەیەك لە فراكسیۆنە جیاوازەكان دروستبكات بۆ ڕاست و دروستی كۆكردنەوەی داهاتی ناوخۆ و دەڵێت: ئەرکی هەردوو پارتەکەیە داهات بە ڕێکوپێکی و شەفافی ڕادەستی وەزارەتی دارایی بکەن، بۆ ئەوەی بتوانن هەموویان سوودمەندبن لە داهات و خزمەتگوزاریی.
داهات لە هەرێمی کوردستاندا، یەکێکە لەو گرفتانەی بووەتە قسەوباسی ڕۆژ و یەنەکە و پەدەکە یەکتر تۆمەتبار دەکەن، بەوەی هۆکارن بۆ دابەشنەکردنی مووچەی مووچەخۆرانی سنووری سلێمانی و هەڵەبجە.
لەوبارەیەوە، گوڵستان سەعید، سەرۆکی فراکسیۆنی گۆڕان لە پەرلەمانی هەرێمی کوردستان بە ڕۆژنیوزی وت: گرنگە سەرۆکایەتیی پەرلەمان لیژنەیەكی هاوبەش لە کۆی فراکسیۆنەکان پێکبهێنێت، بەزووترین کات سەردانی ناوچە سنوورییەکانی هەرێمی کوردستان بکات، بۆ ئەوەی ئەو سنوورانەی مەرزیان تێدایە و داهات کۆدەکەنەوە بۆ هەرێمی کوردستان، بزانرێت گرفت و ئاستەنگییەکان چین، کە داهات کەم دەکات لە ناوچەیەک، تاکو بتوانرێت گرفتی مووچە چارەسەربکرێت، هەروەها پێویستە حکومەتی کوردستان ئەم ئەرکە لە ئەستۆ بگرێ.
سەرۆكی فراكسیۆنی گۆڕان بە پێویستی دەزانێت، پارتی و یەکێتیش هەماهەنگبن لەوەی داهات بە ڕێکوپێکیی کۆبکەنەوە، بتوانن ئەو داهاتە ڕادەستبکەن بەپێی ئەو ڕێژەی ڕێککەوتنەی خۆیان داویانە، کە لە پێشتردا وەها ڕێکەوتوون لە ٤٣٪ لە دەڤەری سلێمانی داهات ڕادەست بە وەزارەتی دارایی بکات، هەروەها لە دەڤەری هەولێر و دهۆک ٥٧٪ی ئەو داهاتە ڕادەستبکرێت، بۆ ئەوەی بتوانن بە هەماهەنگیی لەگەڵ پارەی نەوت و ئەو پارانەی لەگەڵ هاوپەیماناندا و ئەو ٢٠٠ملیارەی لە عێراقەوە دێت، بتوانن لە کات و ساتی خۆیدا مووچە دابەشبکرێت و خزمەتگوزارییەکان بە هاوڵاتییەکان.
وەزیری دارایی لە پشکی بزووتنەوەی گۆڕانە، بۆیە گوڵستان سەعید، دەڵێت: هەردوو پارتی دەسەڵاتدار خۆیان بەڵێنی ئەوەیاندا، کە یارمەتیدەربن بۆ وەزیری دارایی و داهات بخەنە بەردەستی، من دەپرسم ئێستا ئاستەنگ چییە بۆ ئەوەی داهات ناخەنەوە بەردەستی؟، بۆچی وادەکەن شەرمەزاریی بۆ هەموومان درووستببێت و خەڵکی هەرێمی کوردستان، لە بارێکی ناهەموار و قەیراناوی و پڕ نەهامەتی ژیان بەسەربەرێت؟، یاخوود لەکاتی خۆیدا مووچە دابەشناکرێت، ئەرکی هەردوو پارتەکەیە داهات بە ڕێکوپێکی و شەفافی ڕادەستی وەزارەتی دارایی بکەن، حکومەتی کوردستان حکومەتی کۆی کوردستان بێت.
س.س
