بە ئامانجی پاڵپشتییکردنی ژنانی گوندنشین لەبواری کشتوکاڵ، ئاژەڵداریی و هەنگەوانییدا، وەزارەتی کشتوکاڵ و ئەنجومەنی باڵای خانمان یاداشتێکی لێکتێگەیشتنیان واژۆ کرد.
ئەمڕۆ، لە بینای وەزارەتی کشتوکاڵ و سەرچاوەکانی ئاو لە شاری هەولێر، یاداشتێکی لێکتێگەیشتن لەنێوان وەزارەتەکە و ئەنجومەنی باڵای خانمان لەلایەن هەریەک لە بێگەرد تاڵەبانی، وەزیری کشتوکاڵ و خانزاد ئەحمەد، ئەمینداری ئەنجومەنی باڵای خانمانەوە واژۆ کرا.
لێکتێگەیشتنەکە بە ئامانجی داڕشتنی پلانە بۆ هاوکارییکردنی ژنانی گوندنشین، بۆ پەرەپێدانی تواناکانیان و پاڵپشتییکردنیان لە بوارەکانی کشتوکاڵکردن، ئاژەڵداریی، هەنگەوانیی، بەخێوکردنی ماسی و پەلەوەر و چەند بوارێکی دیکەی هاوشێوە.
لە مەراسیمی واژۆكردنەكەدا بێگەرد تاڵەبانی، وەزیری كشتوكاڵ و سەرچاوەكانی ئاوی حکومەتی هەرێمی كوردستان وتی: یەكسانیی جێندەریی لە كابینەی نۆیەمی حكومەتی هەرێمی كوردستان زۆر پێداگیریی لەسەر كراوە، سێ ژن لەم كابینەیەدا پلەی وەزیریان هەیە، ئەنجوومەنی باڵای خانمانیش بەو بەرنامە تازەیەی، كە هەیەتی دەتوانێت خزمەتی زیاتر بە ژنانی كوردستان بكات.
وتیشی: وەزارەتی كشتوكاڵ وەك دەرچەیەك بەڕووی كاركردن و هێنانە پێشەوەی تاكدا کراوەیە، هەوڵ دەدەین بۆ زیادکردنی دەستی کاری ناوخۆ، پێشخستنی وەبەرهێنان و بە پیشەسازییکردنی کشتوکاڵ، لەم پرۆسەیەشدا پێویستمان بەهێز و تاوانای ژنانە، تاکو بتوانن ببن بە خاوەن کار و داهاتی خۆیان.
باسی لەوەش کرد، کە ئەو وەک وەزیرێکی ژن پشتیوانیی تەواو لە پرۆژەکە دەکات.
هەروەها، د. خانزاد ئەمین، ئەمینداری ئەنجومەنی باڵای کاروباری خانمان وتی: هاوكاریی تەواو دەكەین بۆ ئەوەی خانمانی كوردستان لە تەواوی گوندەکانی كوردستان ببنە خاوەن كاری خۆیان و لەو ڕێگەیەشەوە بتوانن سوود بە خۆیان و خانەوادە و بواری كشتوكاڵیش بگەیەنن.
لە کۆنگرەکەدا ڕوونکردنەوە لەبارەی چۆنیەتی پێشکەشکردنی هاوکارییەکان نەدرا.
ش.ف
