سێشەممە, 2 يون 2020 – 15:05 ڕۆژنیوز – ناوەندی هەواڵەکان
وەزارەتی کاروباری دینیی ئیندۆنیسیا، ڕایگەیاند، ئەمساڵ وڵاتەکەی ئەنجامدانی فەریزەی حەجی هەڵوەشاندووەتەوە و ڕێگەی پێنادات، ئەوەش بەهۆی بەردەوامی مەترسییەکانی بڵاوبوونەوەی کۆرۆنا.
ساڵانە سەدان هەزار ئیندۆنوسی گەشتی حەج و عومرە بۆ مەککە و مەدینەی سعودیە ئەنجام دەدەن، بەپێی یاسای ئەو وڵاتەش هەر تاکێک ٢٠ ساڵ جارێک بۆی هەیە فەریزەی حەج ئەنجام بدات.
ئەو هەڵوێستەی ئیندۆنیسیا لە کاتێکدایە هێشتا نە سعودیەی خانە خوێی حەج و نە هیچ وڵاتێکی ئیسلامیش بڕیاریان لەسەر هەڵوەشاندنەوەی ئەو مەراسیمە نەداوە، بەهۆی ئەوەی چاوەڕێی بەرەوپێشچوونی نوێ دەکەن لە بارەی ڤایرۆسەکەوە.
بۆ ئەمساڵ پشکی وڵاتی ئیندۆنیسیا بۆ حەج ٢٢١ هەزار کەسە و بەپێی وەزارەتی پەیوەندیداری ئەو وڵاتەش، ٩٠٪ی ئەو کەسانە مامەڵە و داواکارییان پێشکەشکردووە کە زیاتر لە دوو مانگ و پێنج ڕۆژی ماوە و ئەمساڵ وەرزەکەی دەکەوێتە ناوەڕاستی هاوین و سەرەتای مانگی ئابەوە.
ک.س
