ماسیۆ تولەر، باڵیۆزی ئەمەریکا لە عێراق سەردانی هەولێری کرد و لەگەڵ سەرۆکی هەرێم و سەرۆکی حکومەت و وەزیری ناوخۆدا کۆبویەوە، سەرچاوەیەکیش دەڵێت، تولەر داوای ئازادکردنی گیراوەکانی بادینانی کردووە لە دوو بارزانییەکە.
کونسوڵخانەی ئەمریکا لە هەولیر ئامانجی سەردانەکەی باڵیۆز ماسیۆ تولەری بۆ لای دوو بارزانییەکە و وەزیری ناوخۆی حکومەتی هەرێم خستووەتەڕوو کە دەڵێت، لە کۆبوونەوەی لەگەڵ ئەو سێ بەرپرسە باڵایەدا، ژمارەیەک پرس تاووتوێکران، لەوانەش پشتیوانی ئەمریکا بۆ هەرێم و ناوەند دوابەدوای هێرشە موشەکیەکانی سەر هەولێر و گەڕانەوەی سەلامەت و ئارەزومەندانە و شکۆمەندانەی ئاوارە ئێزیدیەکان بۆ زێدی خۆیان.
هەروەها دەڵێت، لە کۆبونەوەکاندا گفتوگۆ دەربارەی دانوستاندەکانی تایبەت بە بوجە لە نێوان حکومەتی هەرێمی کوردستان و حکومەتی عێراق کراوەو پەیوەندیەکانی نێوان یەنەکە و پەدەکە باسیان لێوەکرا، تیایدا باڵیۆز تولەر جەتی لەوە کردەوە کە یەکگرتوویی هەرێمی کوردستان و حکومەتەکەی باشترین ڕێگەیە بۆ خزمەتکردنی خەڵک و بوژاندنەوەی ئابوری و دابینکردنی ئاساییش و ژینگەیەکی بەهێز بۆ وەبەرهێنان.
لە درێژەی بەیاننامەکەی کونسوڵخانەی ئەمریکا لە هەولێر ئاماژە بەوەشکراوە، باڵیۆز تولەر جەختیکردەوە لە گرنگیی ئازادی ڕادەربڕین و ئازادی ڕاگەیاندن و ئاماژەی بەوەدا کە ویلایەتە یەکگرتووەکانی ئەمریکا پابەند دەمێنێتەوە بە کارکردن لەگەڵ حکومەتی هەرێمی کوردستان و کۆمەڵگای مەدەنی لەسەر ئەم پرسە و دڵنیاییدا لە پەیوەندیەکی بەهێز لەگەڵ حکومەتەکەی بایدن.
دڵشاد مەجید، نوسەر و ڕۆژنامەنوس لە فەیسبووکی خۆیەوە ڕایگەیاندووە، ماسیۆ تولەر بە هەردوو بارزانیەکەی ڕاگەیاندووە کە پێویستە دەستگیراوەکانی بادینان ئازاد بکرێن.
دڵشاد مەجید دەڵێت، ئەوەی مایەی سەرنج بووە لەو سەردانەی دوێنێی باڵیۆزی ئەمریکا، سەردانە نائاساییەکەی بوو بۆلای کەسی دووەمی دەزگای پاراستن و سەرۆکی حکومەتی سێبەر “ڕێبەر ئەحمەد”ی وەزیری ناوخۆ.
بەوتەی ئەو ڕۆژنامەنوسە، وادیارە مەسرور بارزانی بە بالێۆزی ئەمریکای ڕاگەیاندوە کەیسی دەستگیرکراوەکان ئێستا لە وەزارەتی ناوخۆیەو لای رێبەر ئەحمەدە، بۆیە باڵێوزی ئەمریکا سەردانی وەزارەتی ناوخۆی کردووە، پێشیوایە لە عورفی دیبلۆماسیدا، چوونی باڵیۆز بۆ لای وەزارەتی ناوخۆ عورفێکی ئاسایی نیە.
هەروەها دەڵێت، پێدەچێت ئەمە دوا سەردانی ڕەسمی بالۆێز ماسیۆ تولەر بێت بۆ ھەرێم، چونکە لەم ماوەیەدا ئەرکەکەی تەواو دەبێت لە عێراق و باڵوێزی نوێی ئیدارەی ئەمریکا دەست بەکار دەبێت.
ڕۆژنیوز زانیویەتی، لە چەند ڕۆژی ڕابردوودا، کەسوکاری دەستگیرکراوانی بادینان نامەیەکی ناڕەزاییان گەیاندووەتە ماسیۆ تولەر و تیایدا یەک بە یەکی دۆسیەی ئەو گیراوانەیان بۆ ڕوونکردووەتەوە و ئەویش سەرسوڕمانی خۆی بۆ بڕیارەکەی دادگا دەربڕیوە و نیگەرانی خۆی نیشانداوە.
ی. ک
