جۆ بایدن بوو بە ٤٦ هەمین سەرۆكی ئەمریكا

ئەمڕۆ، جۆ بایدن سوێندی یاسایی خوارد ‌و بوو بە ٤٦ هەمین سەرۆكی ئەمریكا.

ڕۆژی سێی مانگی ١١ی ساڵی ڕابردوو، هەڵبژاردنی سەرۆكایەتیی ئەمریكا بەڕێوەچوو كە تێیدا جۆ بایدن كاندیدی دیموكراتەكان، توانیی سەر بكەوێت بەسەر دۆناڵد ترامپی سەرۆك ‌و كاندیدی كۆمارییەكان ‌و دوای ئەوەی كۆنگرێس ئەنجامەكانی پەسەند كرد ‌و ترامپ دیموكراتەكانی بە ساختەكاریی لە هەلبژاردنەكە تۆمەتبار كرد ‌و لایەنگرانیشی هەڵیان كوتایە سەر كۆنگرێس، ئەمڕۆ بایدن وەك براوەی هەڵبژاردنەكە ‌و سەرۆكی نوێی ئەمریكا، سوێندی یاسایی خوارد.

ڕێوڕەسمی سوێند خواردنی بایدن، بە ئامادەبوونی چەند سەرۆكێكی پێشووتر ‌و بەبێ‌ ئامادەبوونی دۆناڵد ترامپ سەرۆكی پێشوو بوو كە ئەوەش یەكەمجار نییە لە ئەمریكا ڕوویدا بێت.

بایدنی ٧٨ ساڵ، كە بەتەمترین سەرۆكە لە مێژووی ئەمریكادا، دوو خول جێگری سەرۆك بوە لە سەردەمی ئۆباما ‌و ٣٠ ساڵیش ئەندامی ئەنجومەنی پیران بوو.

هەروەها كامالا هاریس، بوە یەكەم ژن ‌و یەكەم كەسی بە ڕەگەز ئاسیایی كە ببێتە جێگری سەرۆك كە لە دایك ‌و باوكێكی هیندی ‌و جامایكی لەدایك بوە.

هاوكات بەهۆی ئەو بارودۆخەی چەند ڕۆژی ڕابردوو ‌و كۆرۆناوە، ئاهەنگەكە، بەئامادەبوونی جەماوەرێكی دیاریكراو بوو، هەروەها هەزاران پاسەوانی نیشتمانی لە دەوری باڵەخانەی كاپیتۆڵ بڵاوەیان پێكرا بوو.

ئەمڕۆش ئاژانسەكانی هەواڵ بەناوی یاریدەدەرانی بایدنەوە بڵاویان كردەوە، جۆ بایدن، ١٧ مەرسوم واژۆ دەكات كە كۆمەڵێك لە بڕیارەكانی ترامپ هەڵدەوەشێنێتەوە، لەوانە دۆسیەكانی (گۆڕانكاریی كەشوهەوا، كۆچبەران، كۆرۆنا ‌و دیواری مەكسیك) ‌و چەندانی دیكە.

ئـ ت