سەیدسادق، شەڕڤانێکی شەهید بە گوڵبارانەوە بەخاک سپێردرا

زانا جەلال، ناسراو بە گەنجۆ شارەزووری، لە مەراسیمێکی بەشکۆدا لە شارۆچکەی سەیدسادق بە خاک سپێردرا، مامی شەهیدیش ڕایگەیاند:"سەربەزین بە شەهیدبوونی کوڕەکەمان".


شەهید زانا جەلال ناسراو بە گەنجۆ شارەزووری شەڕڤانی قەسەدە، کە لە ڕۆژی ١٧ی مانگی ڕابردوو لە ڕووبەڕووبونەوەی دەوڵەتی داگیركەری تورك بۆسەر خاكی ڕۆژئاوای كوردستان لەكۆبانێ‌ شەهیدببوو، ئەمڕۆ لە شارۆچکەی سەیدسادق-ی سەربە پارێزگای سلێمانی، لە مەراسیمێکدا بەخاک سپێردرا.

تەرمی شەهید دوای ئەوەی لە ڕۆژئاواوە گەیشتوبووەوە باشوری کوردستان، ئەمڕۆ کاتژمێر ٠٩:٣٠ سەرلەبەیانی، بەرەو زێدی خۆی لە سەیدسادق بەڕێکرا، کە لەلایەن هاوڵاتیانەوە لە نزیک بازگەی سلێمانی – عەربەت پێشوازیی لێکراو هەمووان هاوەڵی شەهیدیان کرد تا بەخاک سپاردنی.

تەرمی شەهید لە سەیدسادق لەلایەن هەزاران کەسەوە لە هەموو توێژەکانی کۆمەڵگا وەک 'خوێندكاران، هێزە ئەمنییەكان، ژنان، منداڵان، فەرمانبەران و مامۆستایانەوە بە گوڵباران پێشوازیی لێکرا، دواتر بەناو ئاپۆڕای جەماوەردا تەرمەكە برایە ماڵی شەهید و لەوێشەوە بۆ دوامەنزڵی بەڕێکرا و بەخاکسپێردرا.

جەلال مستەفا باوكی شەهید گەنجۆ، سوپاسی ئەو پێشوازییەی هاوڵاتیان کرد لە تەرمی ڕۆڵەکەی.

بێستون مستەفا مامی شەهید گەنجۆ، دەربارەی شەهید بە ڕۆژنیوزی وت: ساڵی ٢٠١٤ چەتەکانی داعش هێرشی ڕۆژئاوایان کرد، ئەویش بینی شەڕڤانان بەو گیان فیداییەوە ڕووبەڕووی داعش دەبنەوە، ئەو بیرو باوەڕەی بۆ دروستبوو بچێت دژی چەتەکان شەڕ بكات، لەوکاتەوە ماوەی پێنج ساڵە لەناو شەڕڤاناندایە تا ١٧ی مانگی ڕابردوو شەهیدبوو.

مامی شەهید گەنجۆ، داوایکرد، کە "تەواوی لایەنەكان یەكبگرن، ئێمەش سەربەرزو سەر بڵندین كوڕەكەمان لەو ڕێگە پیرۆزەدا شەهید بووە".

هەروەها ئیبراهیم محەمەد ئەندامی كۆمپتەی شەهیدانی پەكەكە لە باشوری كوردستان وتاری پێشکەشکرد و باسی دڕندەیی دەوڵەتی تورک و ڕۆڵی شەڕڤانان و بەرخۆدانەکان کرد.

هەروەها تارا حسێن وتەبێژی تەڤگەری ئازادیی كۆمەڵگەی كوردستان، لە مەراسیمەکەدا وتی: ئێستا بەخوێنی شەهیدان گەلی كورد یەکیان گرتووە، شەهیدەكانمان بەخوێنی خۆیان سنوورە دەستكردەكانیان سڕیوەتەوە، هەتا ئەمڕۆ ناکۆکی حزبە سیاسییەكان بەردەوامە، پێویستە لەمەودوا لە پێشوازی گەلەكەیاندا یەكێتی نەتەوەیی دروست بكەن.

س.ح