كۆبوونەوەی بەپەلەی ئەنجوومەنی مافی مرۆڤی نەتەوە یەكگرتووەكان بۆ لێكۆڵینەوە لەبارەی سەرهەڵدان و ناڕەزاییەتیەكانی ئێران و ڕۆژهەڵاتی كوردستان، كە لە سێیەم مانگدایە و هەروەها توندوتیژیی و سەركوتكاری هێزەكانی سەر بە دەسەڵات بەرامبەر بە خۆپیشاندەران دەستی پێكرد.
ئەمڕۆ كۆبوونەوەی بەپەلەی ئەنجوومەنی مافی مرۆڤی نەتەوە یەكگرتووەكان بۆ لێكۆڵینەوە لەبارەی سەرهەڵدان و ناڕەزاییەتیەكانی ئێران و ڕۆژهەڵاتی كوردستان، هەروەها توندوتیژیی حكومەت بەرامبەر بە خۆپیشاندەران دەستی پێكرد.
لە كۆبوونەوەكەدا، كە ژمارەیەك لە چالاكوانانی مافی مرۆڤی ئێرانیش بەشدارن، جاوید ڕەحمان، لێكۆڵەری تایبەتی ڕێكخراوی نەتەوە یەكگرتووەكان تایبەت بە مافەكانی مرۆڤ لە ئێران، ڕەخنەی لە كاربەدەستانی كۆماری ئیسلامی گرت، كە لە هیچ حاڵەتێكدا ئامادە نین لەبارەی داخوازییەكانی خۆپیشاندەران گفتوگۆیان لەگەڵ بكەن.
جاوید ڕەحمان هەروەها ئاماژەی بە هێرشی هێزەكانی سەر بە دەسەڵات بۆ سەر زانكۆكان و كوشتنی منداڵانیش كرد، سەبارەت بە دانپێدانانی زۆرەملێ و دەركردنی سزای لەسێدارەدان بۆ خۆپیشاندەرانیش نیگەرانی دەربڕی.
بڕیارە لەو كۆبوونەوەیەكدا ڕەشنوسی بڕیارنامە بۆ پێكهێنانی لیژنەیەكی نێودەوڵەتی بۆ دۆزینەوە و دەستنیشانكردنی ڕاستییەكان، لەبارەی سەركوتكردنی توندوتیژیانەی سەرهەڵدێران، دەنگی لەسەر بدرێت.
ئەو كۆبوونەوە بەپەلەیەیی ئەنجوومەنی مافی مرۆڤی نەتەوە یەكگرتووەكان لەكاتێكدایە، لە ئەنجامی توندوتیژی و تەقەی ڕاستەوخۆی هێزەكانی ڕژێمی ئێران تا ئێستا زیاتر لە ٤٠٠ خۆپیشاندەر، كە نزیكەی ٥٠ كەسیان تەمەنیان خوار ١٨ ساڵەوەیە، گیانیان بەخت كردووە.
ڕ.ڕ
