له‌یلا گوڤه‌ن نامه‌یه‌کی بۆ سی پی تی نارد

له‌یلا گوڤه‌ن که‌ پێشه‌نگایه‌تی مانگرتنه‌کانی دژ به‌ گۆشه‌گیریی سه‌ر ئۆجالان ده‌کات، نامه‌یه‌کی بۆ میکۆلا گناتۆڤسکی سه‌رۆکی کۆمیته‌ی ڕێگرتن له‌ ئه‌شکه‌نجه ‌ (CPT)ی سه‌ر به‌ کۆنسه‌ی ئه‌وروپا نارد.


له‌یلا گوڤه‌ن هاوسه‌رۆکی کۆنگره‌ی کۆمه‌ڵگه‌ی دیموکراتی (که‌جه‌ده‌) و په‌رله‌مانتاری پارتیی دیموکراتیی گه‌لان (هه‌ده‌په‌) که‌ ٨٤ ڕۆژه‌ مانی له‌ خواردن گرتووه‌، له‌ نامه‌که‌یدا باسی له‌ گۆشه‌گیریی سه‌ر ئیمڕاڵی کردووه‌ و داوای له‌ سی پی تی کردووه‌ به‌رپرسایه‌تیی خۆی جێبه‌جێ بکات.

له‌ نامه‌که‌دا هاتووه‌، له‌ تورکیا به‌ربه‌ستی گه‌وره‌ له‌ به‌رده‌م دیموکراتیبوون و ئاساییبوون هه‌یه، مه‌ترسیدارترین به‌ربه‌ستیش گۆشه‌گیریی چه‌ند ساڵه‌ی ئیمڕاڵییه‌ له‌سه‌ر به‌ڕێز عه‌بدوڵا ئۆجالان. ئۆجالان له‌ چاره‌سه‌ریی ئاشتییانه‌ی کێشه‌ی کورد-دا ڕۆڵی به‌رچاوی گێڕاوه‌ و له‌ ئێستا به‌دواوه‌ش ده‌توانێت به‌ هه‌مان ڕۆڵ هه‌ستێت.

"ئه‌م حکوومه‌ته‌ که‌متر نییه‌ له‌ دیکتاتۆری"

گوڤه‌ن مامه‌ڵه‌ی حکوومه‌تی تورکی له‌ به‌رانبه‌ر ئۆجالان وه‌ک «ئه‌شکه‌نجه‌ی گۆشه‌گیری له‌ دژی قانوون و حقووقی نێوده‌وڵه‌تی» ناوبردووه‌ و هێمای بۆ ئه‌وه‌ کردووه‌، حکوومه‌ت ئه‌م ئه‌شکه‌نجه‌یه‌ی له‌نێو ته‌واوی سیسته‌می سیاسیی تورکیا بڵاوکردووه‌ته‌وه‌، بۆیه‌ زه‌مینه‌ی سیاسه‌تی دیموکراتی زۆر که‌مه‌.

له‌یلا گوڤه‌ن نووسیویه‌تی: "حکومه‌تی تورک حکوومه‌تێکی وه‌هایه‌ هه‌ڕه‌مه‌کی ده‌ئافرێنێت که‌ که‌متر نییه‌ له‌ دیکتاتۆری و دان به‌ ده‌ستووری خۆی و بڕیاره‌کانی دادگه‌ی مافه‌کانی مرۆڤی ئه‌ورووپادا نانێت. ئه‌م حکوومه‌ته‌، منی ساڵێک له‌ زینداندا به‌ند کرد که‌ ژنێکی کوردم و سیاسه‌تمه‌دارێکم که‌ ئیراده‌ی سێیه‌مین گه‌وره‌پارتیی تورکیام که‌ ٦ ملیۆن ده‌نگی به‌ده‌ستهێناوه"‌.

"به‌رده‌وام ده‌بم له‌ مانگرتن"

له‌ درێژه‌ی په‌یامه‌که‌دا هاتووه‌: "له‌پێناو کۆتاییهێنان به‌ گۆشه‌گیرکردنی به‌ڕێز ئۆجالان و هه‌ڵگرتنی سیسته‌می ئه‌شکه‌نجه‌، ٨ی تشرینی دووه‌م له‌ زیندان ده‌ستم به‌ مانگرتن له‌ خواردن کرد. له‌ ڕۆژی ٧٩هه‌می مانگرتنه‌که‌مدا (٢٥ی کانوونی دووه‌می ٢٠١٩) ئازاد کرام. مافی به‌ڕێز ئۆجالانه‌ که‌ له‌ژێر گۆشه‌گیری ده‌ربهێنرێت و دڵنیایی پێبدرێت که‌ ده‌توانێت پارێزه‌ر و خانه‌واده‌که‌ی به‌ ڕێکوپێکی ببینێت. ده‌مه‌وێ ئێوه‌ بزانن که‌ هه‌تا ئه‌مه‌ به‌دی دێت، به‌رده‌وام ده‌بم له‌ مانگرتنه‌که‌م له‌ خواردن."

"هه‌ڵگرتنی گۆشه‌گیری چاکه‌یه‌ک نییه‌"

گویڤه‌ن سه‌رنجی خسته‌ سه‌ر بڕیاره‌کانی سی پی تی ده‌رباره‌ی گۆشه‌گیری و ڕاپۆرتی تورکیا له‌ دوایین کۆبوونه‌وه‌ی ئه‌نجومه‌نی په‌رله‌مانتارانی کۆنسه‌ی ئه‌ورووپا. له‌ چوارچێوه‌ی ئه‌و بڕیار و ڕاپۆرتانه‌دا گوتی، "کۆتایی هێنان به‌ گۆشه‌گیریی به‌ڕێز عه‌بدوڵا ئۆجالان چاکه‌یه‌ک نییه‌، به‌ڵکو ئه‌مه‌ په‌یوه‌ندی به‌ پاراستنی پێوانه‌سه‌ره‌کییه‌کانی مافی مرۆڤ و سه‌روه‌ری قانوونه‌وه‌ هه‌یه‌."

"پێویسته‌ سی پی تی ئه‌رک و به‌رپرسایه‌تیی خۆی جێبه‌جێ بکات"

له‌یلا گیوڤه‌ن له‌ نامه‌که‌یدا بۆ سی پی تی ده‌ستنیشانی کردووه‌: "من ده‌زانم که‌  ئێوه‌ش به‌ ناوی سی پی تی له‌سه‌ر ئه‌و پیوانانه‌ی که‌ باسم کردووه‌، له‌گه‌ڵ کاربه‌ده‌ستانی حکومه‌تی تورک ده‌نوستان ده‌که‌ن. ئاگام له‌و هه‌وڵه‌ هێژایانه‌ی ئێوه‌ هه‌یه‌. ده‌مه‌وێت به‌تایبه‌تی ده‌ستنیشانی بکه‌م؛ مۆدێلی به‌ڕێوه‌بردنی زیندانه‌کان به‌تایبه‌تی زیندانی ئیمڕاڵی له‌ تورکیا، له‌ لایه‌ن حکوومه‌تی تورک-ه‌وه‌ وه‌ک ئامرازێک بۆ سه‌رکوتکردنی ئۆپۆزسیۆن و کێشه‌ کورد له‌ ڕێی تووندوتیژی به‌کارده‌هنێرێت، مانگرتن له‌ خواردنی بێسنوور و بێ نۆبه‌ت که‌ که‌وتووه‌ته‌ ڕۆژی ٨٢هه‌م، بۆ داواکارییه‌کی تایبه‌ت ده‌ستی پێنه‌کرد‌، به‌ڵکوو چالاکییه‌کی ڕه‌وایه‌ که‌ داوای مافێکی ڕه‌وا ده‌کات. له‌ زیندانه‌کان ٢٨١ که‌س که‌ ٤٩یان ژنن، له‌ ده‌ره‌وه‌ی تورکیاش ١٨ که‌س ئه‌م چالاکییه‌ به‌ڕێوه‌ده‌به‌ن. باوه‌ڕم وایه‌ که‌ سی پی تی ماف و ئه‌رکی خۆی به‌باشی به‌کاردێنێت و له‌ دژی گۆشه‌گیریی ڕه‌وای گۆشه‌گیریی سه‌ر ئیمڕاڵی هه‌وڵه‌کانی ده‌خاته‌گه‌ڕ. چاوه‌ڕوانم که‌ ئێوه‌ به‌ ئه‌رک و به‌رپرسایه‌تیی خۆتان هه‌ستن."


ک.ک