لەبەردەم پەرلەمانی ئەوروپا چالاکیی جەماوەریی بەرفراوان ئەنجام دەدرێت

ڕۆژی ١٦ی کانوونی دووەم لە شاری ستراسبورگی فەرەنسا بە بەشداریی چالاکوانانی مانگرتوو، چالاکیی جەماوەریی لەبەردەم بینای پەرلەمانی ئەوروپا ئەنجام دەدرێت.


بۆ شەرمەزارکردنی گۆشەگیریی سەر عەبدوڵا ئۆجالان ڕێبەری پەکەکە و داخوازیی چارەسەری دۆخی تەندروستی، ئاسایش و ژیانی ئەو، مانگرتن لەخواردن بەردەوامە، چالاکی مانگرتن لەخواردنی لەیلا گوڤەن هاوسەرۆکی کەجەدە و پەرلەمانتاری هەدەپەی جۆلەمێرگ، لە ڕۆژی ٦٨ـمینی دایە، چالاکی مانگرتن لەخواردن لە هەولێر، ستراسبورگ و شاری نەوپۆرت-یش بەردەوامە.

بۆ سەرنجڕاکێشانەسەر داخوازییەکانی بەرخۆدێرانی چالاکیی مانگرتن لەخواردن، بە پێشەنگایەتیی کەجەدەی ئەوروپا کوردستانیان و دۆستانیان لە وڵاتانی ئەوروپا ڕۆژی ١٦ی کانوونی دووەم کاتژمێر ١١:٠٠ی پێش نیوەڕۆ بە ژمارەیەکی زۆر لە ستراسبورگی وڵاتی فەرەنسا لەبەردەم پەرلەمانی ئەوروپا کۆدەبنەوە.

کەجەدەی ئەوروپا دوێنی لەسەر چالاکییەکە ڕاگەیەندراوێکی بڵاوکردەوە و سەرنجیڕاکێشابووە سەر بێدەنگیی ڕێکخراوەکانی نێودەوڵەتیی لە بەرامبەر سایسەتە چەپەڵەکانی دەوڵەتی تورک، لە ڕاگەیەندراوەکە هاتبوو کە بێدەنگی ئەو ڕێکخراوانە لە بەرامبەری چالاکی مانگرتن لەخواردن، گورز لە ویژدانەکان دەدات و بەها مرۆییەکان دەخاتە ژێر پێیەوە.

لە ڕاگەیەندراوەکە هەروەها هاتووە: ١٦ی کانوونی دووەم لە ٧٠ـەمین ڕۆژی چالاکی مانگرتن لەخواردنی لەیلا گوڤەن-دا، ڕۆژی ٥٧ـەمینی چالاکی هەولێر، ڕۆژی ٣٢ـەمینی چالاکی زیندانەکان ڕۆژی ٣١ـەمینی چالاکی ستراسبورگ، ئێمە لە بەردەم ڕێکخراوی CPT، کۆنسەی ئەوروپا و پەرلەمانی ئەوروپا چالاکی ئەنجام دەدەین، بەو چالاکیە داخوازی چالاکوانانی مانگرتوو لەخواردن بەرز دەکەینەوە و بانگەوازی لەو ڕێکخراوانە دەکەین کە خۆیانیان کوێر و کەڕ و لاڵ کردووە.

هەروەها هاتبوو:بە ناوی کەجەدەی ئەوروپا و تەژەکەی ئەوروپا بانگەوازی لە مرۆڤە خاوەن ویژدان و بە کەرامەتەکان دەکەین، بانگ لە ژن، گەنج، گەلان، دوژمنانی فاشیزم، شۆڕشگەران، دیموکراتەکان، ڕۆشنبیران و هەموو دۆستەکانمان دەکەین بەشداری چالاکیەکەی ١٦ی ئەم مانگە لە بەردەم پەرلەمان و کۆنسەی ئەوروپا و CPT، ببن کە چالاکوانانی مانگرتوو لەخواردنی ستراسبورگیش بەشدارن تێدا.

ش.ف