لە شاری برۆكسلی پایتەختی بەلجیكا، ڕۆژنامەنووسانی چوار بەشی کوردستان یادی ڕۆژنامەنووس سەردەشت عوسمان-یان بەرز ڕاگرت و ڕایانگەیاند، پەیامەكەی سەردەشت بە هەر چواری بەشی كوردستاندا بڵاوبووەتەوە و بەڵێنیان دووپاتكردەوە درێژە بە ڕێگای تێكۆشانی سەردەشت و هاوڕێكانی دەدەن.
ئەمڕۆ لە شاری برۆكسلی پایتەختی بەلجیكا، كۆمەڵێك ڕۆژنامەنوسی هەر چوار بەشی كوردستان یادی شەهیدكردنی سەردەشت عوسمانیان بەبیرهێنایەوە.
لە مەراسیمەکەدا، فەرمان محەمەد وتارێكی پێشکەش کرد و وتی: ١٢ ساڵ پێش ئێستا سەردەشت عوسمان تەنها ڕۆڵەی ماڵەكەی خۆیان بوو، بەڵام ئەمڕۆ هەر چوار بەشی کوردستان بۆ یادی سەردەشت کۆبووەتەوە، ئەمەش دەرخەری ئەوەیە پەیامەکەی سەردەشت عوسمان بە چوار بەشی کوردستاندا بڵاوبووەتەوە.
ئەو ڕۆژنامەنووسە وتیشی: وەك چۆن دەسەڵاتی باشووری كوردستان ١٢ ساڵ پێش ئێستا قەڵەمێكی بوێری شەهیدكرد، ئەمڕۆیش بە هەمان عەقڵێتی ئەوكاتە بیردەكاتەوە، بە بەڵگەی ئەوەی ڕۆژنامەنوسانی بادینان لە زیندانەكانی پەدەكەدان و تۆسقاڵێك لە عەقڵیەتی ١٢ پێش ئێستایان نەگۆڕدراوە و خاكمان داگیر دەكرێت و بێ باكن.
وتیشی: ئەگەر ١٢ پێش ئێستا یادی سەردەشتمان لە هەولێر دەكردەوە، ئێستا لە دەرەوەی هەرێم یدای دەكەینەوە، لە هەركوێ بین یادی سەردەشت دەكەینەوە و ئەو بەڵێنەی بەسەردەشت و هاورێكانیانمان داوە، جەختی لەسەر دەکەینەوە و سوورین لەسەر خەبات و ڕێگای تێكۆشانی ئازادی خوازان بەردەوامین.
ڕۆژی چواری ئایاری ساڵی ٢٠١٠، لەبەردەم کۆلێژی ئادابی زانكۆی سەلاحەدین، ڕۆژنامەنووس سەردەشت عوسمان لەلایەن چەند كەسێكەوە ڕفێندرا و ڕۆژی پێنجی ئایار تەرمەكەی لە ڕێگای موسڵ دۆزرایەوە، شەهیدكردنی سەردەشت عوسمان كاردانەوەی توندی لە ناوخۆ و دەرەوەدا بەدوای خۆیدا هێنا، ساڵانە لە ڕۆژی تیرۆركردنیدا لە ناوەوە و دەرەوەی هەرێمدا یادی دەكرێتەوە.
س.س
