لە دادگای ئەوروپا كار بۆ ئازادكردنی دەمیرتاش و هاوڕێكانی دەكرێت

پارێزەری هاوسەرۆکانی پێشوو و پەرلەمانتارانی زیندانیکراوی هەدەپە ئاشكرایكرد، کە لە دادگای مافی مرۆڤی ئەوروپا پێنج سکاڵایان بۆ ئازادکردنى سەڵاحەدین دەمیرتاش و فیگەن یوکسەکداغ، هاوسەرۆکانی پێشووى هەدەپە و حەوت پەرلەمانتاری دیكەی هەدەپە تۆمارکردووە، چاوەڕێ دەکەن دادگاکە لەوبارەیەوە بڕیار بدات.


ماوەی زیاتر لە دوو ساڵە هاوسەرۆكانی پێشووی پارتی دیموكراتی گەلان- هەدەپە و ژمارەیەك لە پەرلەمانتارانی ئەو حزبە لە زینداندان.

ڕەیحان یاڵچنداغ، پارێزەری هاوسەرۆکانی پێشوو و پەرلەمانتارانی زیندانیکراوی هەدەپە، لەبارەی زیندانیکردنیانەوە وتی، پێنج سکاڵایان لە دادگای مافی مرۆڤی ئەوروپا (DMME) تۆمارکردووە، ئێستاش چاوەڕێن ئەو دادگایە لە ماوەیەکی کەمدا بڕیاری خۆی لەو بارەیەوە ئاشکرا بکات.

یاڵچنداغ ڕاشیگەیاند، دوای تۆمارکردنی سکاڵاکانیان بۆ ئازادیی هاوسەرۆکانی پێشوو و پەرلەمانتارانی هەدەپە، دادگای مافی مرۆڤی ئەوروپا داوای لە تورکیا کردووە بەرگری لە خۆی بکات، تورکیاش بەرگرییەکەی خۆی ڕەوانەی دادگای مافی مرۆڤی ئەوروپا کردووە، ئێستاش چاوەڕێی بڕیاری دادگای مافی مرۆڤی ئەوروپان لەو بارەیەوە.

رۆژی ٤ی تشرینی دووەمی ٢٠١٦ سەڵاحەدین دەمیرتاش و فیگەن یوکسەکداغ هاوسەرۆکانی ئەوكاتی هەدەپە و ژمارەیەك پەرلەمانتار دەستگیرکران، دواتر سڕی سورەیا ئۆندەر، زیا پیر و ئیمام تاشچەر بە مەرجی مانەوە لە ژێر چاودێریی دادگادا ئازادکران، بەڵام سەڵاحەدین دەمیرتاش و فیگەن یوکسەکداغ هاوسەرۆکانی هەدەپە و ئیدریس بالوکەن سەرۆکی فراکسیۆنی هەدەپە و عەبدوڵا زەیدان، فەرهاد ئەنجو، لەیلا بیرلیک، گولسەر یڵدرم و نورسەل ئایدۆغان زیندانیکران.

د.ع