لە ڕانیە و کەلار سەردانی گڵکۆی شەهیدان کرا

لە هەردوو شارۆچکەی ڕانیە و کەلار، کۆمیتەی خانەوادەی شەهیدانی پەکەکە لە باشوری کوردستان، سەردانێکی بۆ سەر گڵکۆی شەهیدان ڕێکخست و لە بەردەم شەهیداندا بەڵێنی درێژەدان بە ڕێگای ئازادیی درا، هەروەها خانەوادەی شەهیدان داوای یەکگرتن و یەکڕیزییان لە گەلی کورد کرد.


وەک نەریتێکی ساڵانە، خانەوادەی شەهیدان و کۆمیتەی خانەوادەی شەهیدانی پەکەکە لە باشوری کوردستان و ئەندامان و ڕێکخستنەکانی تەڤگەری ئازادیی و ڕژاک، لەگەڵ نزیک بوونەوەی بۆنە ئاینی و نەتەوایەتییەکاندا سەردانی گڵکۆی شەهیدان دەکەن و یادیان دەکەنەوە.

لەو چوارچێوەیەشدا ئێوارەی ئەمڕۆ لە شارەدێی باوەنور و شارەدێی ڕزگاری و شارۆچکەی کەلاری ناوەندی ئیدارەی گەرمیان، سەردانی گڵکۆی چەند شەهیدێک کرا.

هاوڕێ جەبار، هاوسەرۆکی تەڤگەری ئازادیی ئەنجومەنی گەرمیان لەسەر گڵکۆی شەهید کاروان گابار وتارێکی پێشکەشکرد و وتی: وەک ئەرکی خۆمان ڕۆژێک پێش دەستپێکردنی جەژن سەردانی مەزاری شەهیدانی ڕێگای ئازادی کوردستان دەکەین و یەکەم جار جەژن لەئەوان پیرۆز دەکەین، هەروەها بەڵێنی کار و خەبات نوێ دەکەینەوە، ئەمڕۆش لە درێژەی سەردانەکەماندا شەهیدانی گەریلا و شەرڤان و چەد شەهیدێکی ترمان بەسەر کردوە لە ناحیەی باوەنور و شارۆچکەی کەلار و ناحیەی ڕزگاری.

دواترعەلی حەمەساڵح، باوکی شەهید کاروان گابار، وتارێکی پێشەشکرد و وتی: بەناوی خانەوادەکەمانەوە پەیمان نوێ دەکەینەوە تاکو دوا هەناسە داکۆکی لەماف و خەباتی گەل و ئەو ڕێگەیەش بکەین کە شەهیدانی ڕێگای ئازادی خوێنیان بۆ بەخشیوە، خۆبەختکردن و بەخشینی خوێنی شەهیدان، لەپێناو گەلێکی داگیرکراو و پارچەکراودا بووە، بۆیە ناوی شەهیدانی ڕێگای ئازادیی کوردستان بە نەمری دەمێنێتەوە.

هەر ئێوارەی ئەمڕۆ، کۆمیتەی خانەوادەی شەهیدانی پەکەکە لە باشوری کوردستان، تەڤگەری ئازادیی، پەیەدە و کۆمیتەی شەهیدانی کۆدار، سەردانی گڵکۆی شەهیدانیان کرد لە شارۆچکەی ڕانیە.

سەید خالید، هاوسەرۆکی تەڤگەری ئازادیی کۆمەڵگەی کوردستان هەرێمی ڕاپەڕین لەسەر گڵکۆی شەهیدان قسەیکرد و وتی: پیرۆزبایی جەژن لە موسڵمانانی جیهان و کەس و کاری شەهیدان و ڕێبەر ئاپۆ و گەریلا و شەرڤانان دەکەین، گەلەکەمان ئەم ساڵ لە بارودۆخێکی دژواردا جەژنی ڕەمەزان پیرۆز دەکات، ئەم ساڵ قەیرانێکی دارایی و داگیرکاریی تورکیا لەسەر باشور و ڕۆژئاوای کوردستان لە ئارادایە و ڕۆژ بە ڕۆژ داگیرکاریی زیاتر دەبێت، بۆیە لە ئئێستادا لە هەر کات زیاتر گەلی کورد پێویستی بە یەکێتی نەتەوەیی و یەک دەنگی هەیە.

دواتر بەکر کۆبانی، لەسەر ناوی ئەنجومەنی پەیەدە لە هەرێمی ڕاپەڕین قسەی کردو ڕایگەیاند: پێرۆزبایی جەژن لە هەموو لایەک دەکەین و هیوادارین جەژن ببێتە مایەی یەک ڕێزی نێوان کوردان، وەک چۆن لە ڕۆژئاوای کوردستان لە ماوەی چەند ڕۆژی ڕابردوودا نزیکەی ۲٥ لایەن و ڕێکخراو یەکیان گرت و ئەوەش سەرکەوتنێکە لە بەرامبەر دوژمنان، بۆیە پێویستە ئەو هەنگاوانە لە پارچەکانی دیکەی کوردستانیش پەرەی پێ بدرێت و هەنگاوی زیاتری بۆ بنرێت.

د.ع