لە گەرمیان ڕووبه‌ڕووبونه‌وە ڕوویدا و دوو ئه‌میری داعشیش ده‌ستگیركران

بۆ ده‌ستگیركردن و ڕاودوونانی چه‌ته‌كانی داعش، به‌شی ئۆپه‌راسێونه‌كانی ئاسایشی گه‌رمیان و سلێمانی ئۆپه‌راسێونێكیان ئه‌نجامدا و دوو ئه‌میری چه‌ته‌كانی داعشیشیان ده‌ستگیركرد.


به‌یانی ئه‌مڕۆ، له‌ سنوری شاره‌دێی زنانه‌ی سه‌ر به‌ شارۆچكه‌ی كفریی  ئیداره‌ی گه‌رمیان، له‌درێژه‌ی ئۆپه‌راسێونه‌ هاوبه‌شه‌كانی ئاسایشی سلێمانی و گه‌رمیان، ئۆپه‌راسێونێك ئه‌نجامدرا.

عوسمان عه‌بدولكه‌ریم، به‌ڕێوه‌به‌ری ڕاگه‌یاندنی ئاسایشی گه‌رمیان، بۆ ڕۆژنیوز وتی: ئۆپه‌راسێۆنه‌كه‌ له‌ هه‌ردوو گوندی په‌ڵكانه‌ و شۆرا و ئه‌نجامدراوه‌، كه‌ موڵگه‌ی سه‌ره‌كی چه‌ته‌كانی داعشی تێدایه‌، دوای ئه‌وه‌ی هێزه‌كانی ئاسایش گه‌یشتونه‌ته‌ گونده‌كه‌، ڕووبه‌ڕووبوونه‌وه‌، له‌گه‌ڵ چه‌ته‌كانی داعش ڕوویداوه‌ و بۆ ماوه‌یه‌ك به‌رده‌وامی هه‌بوو و توانراوه‌، دوو ئه‌میری چه‌ته‌كان ده‌ستگیربكرێت و كارمه‌ندێكی ئۆپه‌راسیونه‌كانی ئاسایشی سلێمانی به‌ سووكی برینداربووه‌.

به‌رپرسه‌كه‌ی ئاسایشی گه‌رمیان، وتیشی: ئه‌م ئۆپه‌راسێۆنه‌ درێژكراوه‌ی ئۆپه‌راسێۆنه‌كانی دیكه‌یه‌ كه‌ له‌ماوه‌ی ده‌ ڕۆژی ڕابردوودا، ئه‌نجامدراوه‌ و تێدا توانراوه‌ به‌م دوو كه‌سه‌وه‌ نۆ كه‌س ده‌ستگیربكرێت، كه‌ هه‌موویان پله‌دارن و به‌رپرسیارێتیان هه‌یه‌.

به‌ پێی زانیارییه‌كانی ئاسایشی گه‌رمیان، ئه‌و دوو ئه‌میرەی ده‌ستگیركراون داوا كراون له‌ لایه‌ن هاوپه‌یمانان و هێزه‌ عێراقییه‌كان، له‌ ئێستادا له‌ لای هێزه‌كانی ئاسایش ده‌ستبه‌سه‌رن.

ک.س