ماکرۆن بۆ ئیلهام ئەحمەد: نیگەرانین لە ئەگەری هێرشی تورکیا

سەرۆک کۆماری فەرەنسا لەگەڵ سەرۆکی دەستەی بەڕێوبەریی ئەنجومەنی سوریای دیموکراتی- مەسەدە، کۆبووەوە و ڕایگەیاند، کە فەرەنسا نیگەرانە لە ئەگەری هێرشی تورکیا بۆسەر ڕۆژئاوای کوردستان و پشتیونایی بۆ قەسەدە نیشاندا.


بەپێی هەواڵێکی فرانس پرێس، ئەمڕۆ ئیمانوێل ماکرۆن سەرۆک کۆماری فەرەنسا لەگەڵ ئیلهام ئەحمەد سەرۆکی دەستەی بەڕێوبەری ئەنجومەنی سوریای دیموکرات- مەسەدە، کۆبووەتەوە و رایگەیاندووە: ئەگەری هێرشی تورکیا مایەی نیگەرانی ئەوانە.

سەرچاوەیەک لە کۆشکی ئلیزە ئاشکرای کردووە، "ئەوەی دیارە ئەوەیە کە فەرەنسا لەگەڵ قەسەدە دایە، چونکە لە تێکۆشانی دژی داعشدا یەکێک لە هاوکارە گرنگەکانمانن".

سەرچاوەکە کە نەیویستووە ناوی ئاشکرا بکرێت ئاماژەی بەوەداوە کە ئەگەر تورکیا لە سوریا ئۆپەراسیۆنێک ئەنجامبدات، دەبێتە مایەی نیگەرانی فەرەنسا و وتی: "ئەو پەیامەش بە کاربەدەستانی تورکیا ڕادەگەیەندرێت".

ش.ف