ناوه‌رۆکی کۆبوونه‌وەکە‌ی ماکرۆن و شاندی ڕۆژئاوا

شاندێکی فیدراسیۆنی باکور و ڕۆژهه‌ڵاتی سوریا سه‌ردانی پاریسیان کرد و له‌گه‌ڵ ئیمانوێل ماکرۆن، سه‌رۆک کۆماری فه‌ره‌نسا کۆبوونەوە، لە کۆبوونەوەکەشدا فەرەنسا پشتگیری خۆی بۆ باکوری سوریا بەردەوام دەکات.


ئەمڕۆ شاندێکی فیدراسیۆنی باکور و ڕۆژهه‌ڵاتی سوریا لە پاریس له‌گه‌ڵ ئیمانوێل ماکرۆن کۆبوونەوە، دوای کۆبوونەوەکەش سه‌رۆکایه‌تیی کۆماری فه‌ڕه‌نسا ڕاگەیەندراوێکی بڵاوکردەوە.

لە ڕاگەیەندراوەکەدا هاتووە: هێشتا داعش مه‌ترسییه‌ بۆ سه‌ر ئاسایشی هاوبه‌ش، به‌تایبه‌تی به‌هۆی بابه‌تی چه‌ته‌کانی داعش و خێزانه‌کانیان که‌ به‌ندکراون، بۆیه‌ فه‌ڕه‌نسا به‌رده‌وامی به‌ پشتگیری خۆی ده‌دات بۆ خۆبه‌ڕێوه‌به‌ریی باکور و ڕۆژهه‌ڵاتی سوریا، سه‌باره‌ت به‌ پێداویستییه‌ مرۆییه‌کان و ئاسایشی کۆمه‌ڵایه‌تی و ئابووری کۆمه‌ڵگه‌ی سوریا هاریکاریی ماددی پێشکه‌ش ده‌که‌ین.

له‌نێو ئه‌و شانده‌ی له‌گه‌ڵ ماکرۆن کۆبوویه‌وه‌، هاوسه‌رۆکی فیدراسیۆنی باکور و ڕۆژهه‌ڵاتی سوریا عه‌بید حه‌مید مه‌هباش و فه‌رمانده‌یه‌کی یه‌کینه‌کانی پاراستنی ژن -یه‌په‌ژه‌ نه‌سرین عه‌بدوڵا هه‌بوون، شانده‌که‌ دوای دیداره‌که‌ی له‌گه‌ڵ سه‌رۆک کۆماری فه‌ڕه‌نسا کۆنگرەیەکی ڕۆژنامەنووسیان ساز کرد.

عه‌بید حه‌مید مه‌هباش ده‌رباره‌ی دیداره‌که‌ ڕایگه‌یاند: له‌ تێکۆشینی دژبه‌ تێرۆردا خۆبه‌ڕێوه‌به‌ریی باکور و ڕۆژهه‌ڵاتی سوریا پێویستی به‌ هاریکاری هه‌یه‌، ماکرۆن له‌وباره‌یه‌وه‌ به‌ڵێنی هاریکاری دووپات کرده‌وه‌. وتیشی، سه‌رۆک کۆماری فه‌ڕه‌نسا دووباره‌ی کرده‌وه‌ که‌ فه‌ڕه‌نسا بۆ سه‌رله‌نوێ بونیادنانه‌وه‌، پشتگیریی ئابووری پێشکه‌شی خۆبه‌ڕێوه‌به‌رییه‌که‌ ده‌کات.

"پێویسته‌ له‌سه‌ر سنوور ئارامی هه‌بێت"

باس لەوەش کرا کە له‌ دیداره‌که‌دا باس له‌ هێرشه‌کانی تورکیا کراوه‌، سه‌رۆک کۆمار ئاماژه‌ی بۆ ئه‌وه‌ کردووه‌ پێویسته‌ له‌سه‌ر سنووری تورکیا ئاشتی و ئارامی به‌رقه‌رار بێت، مه‌هباش وتی، ئێمه‌ ده‌مانه‌وێت له‌گه‌ڵ هه‌موو دراوسێکانمان به‌تایبه‌تی تورکیا په‌یوه‌ندیمان باش بێت.

"ده‌رگای ئێمه‌ به‌ ڕووی ئاشتیدا کراوه‌یه‌"

هاوسه‌رۆکی فیدراسیۆنی باکور و ڕۆژهه‌ڵاتی سوریا له‌ درێژه‌ی قسه‌کانیدا ڕایگه‌یاند: ماکرۆن وتی به‌رده‌وام ده‌بن له‌ پشتیوانیکردنی هێزه‌کانی سووریای دیموکراتی (قه‌سه‌ده‌). له‌ وه‌ڵامی پرسیارێکیشدا ئاماژه‌ی بۆ ئه‌وه‌ کرد که‌ په‌یوه‌ندییان له‌گه‌ڵ ڕووسیاش هه‌یه‌. ناوبراو ڕایگه‌یاند: ده‌رگه‌مان بۆ هه‌موو لایه‌نه‌کان کراوه‌یه‌ له‌پێناو به‌رژه‌وه‌ندیی گه‌لان و قۆناغی تێپه‌ڕاندنی دۆخه‌که‌، ته‌نانه‌ت له‌گه‌ڵ ڕژێمی سووریاش.

دامه‌زراندنی دادگایەکی نێونه‌ته‌وه‌یی

سه‌باره‌ت به‌ داواکاریی دامه‌زراندنی دادگا‌یه‌کی نێونه‌ته‌وه‌یی بۆ دادگا‌ییکردنی چه‌ته‌کانی داعش له‌ ناوچه‌که‌، مه‌هباش ڕایگه‌یاند، ئه‌م بابه‌ته‌ هێشتا له‌ قۆناغی گفتوگۆدایه‌. وتیشی، "ئێمه‌ پێشنیازمان بۆ کۆمه‌ڵگه‌ی نێونه‌ته‌وه‌یی کردووه‌. داوامان کرد حقووقناسانی نێونه‌ته‌وه‌ییش به‌شداری بکه‌ن، چونکه‌ زۆرینه‌ی ئه‌و تێرۆیستانه‌ خه‌ڵکی وه‌ڵاتانی بیانین."


ک.ک