پژاک بۆ دۆخی زیندانیانی سیاسیی ڕەخنەی توند لە ئێران دەگرێت

لە بەیاننامەیەکدا پژاک ڕەخنەی توند لە دەسەڵاتدارانی ئێران دەگرێت و ڕایدەگەیەنێت، هەر چەشنە مەترسییەک لەسەر زیندانیانی سیاسیی ئێران دەسەڵات لێی بەرپرسیارە و دەشڵین ئەوان چاوپۆشیی لە کەمووکورتییەکانی حکومەتی ئێران ناکەن.


لە ئێران و ڕۆژهەڵاتی کوردستان هەزاران کەس تووشی ڤایرۆسی کۆرۆنا بوون، ئەمەش نیگەرانیی زۆری لێکەوتووەتەوە و حکومەتی ئێران بە کەمتەرخەم دەزاندرێت، بەتایبەت بۆ دۆخیی زیندانیانیی سیاسیی، لەم بارەیەوە پارتی ژیانی ئازادیی کوردستان- پژاک، بەیاننامەیەکی بڵاوکردەوە.

لە بەیاننامەکەدا هاتووە: ڕوانینی زاڵ بەسەر سیاسەتی ناوخۆیی ئێران لەسەر بنەمای ئەمە دانراوە کە دەتوانێت هەڕەشەکان بکاتە دەرفەت، شایەنی باسە کە لەم تێڕوانیینەدا تەنها بەرژەوەندییەکانی تاکلایەنەی دەوڵەت و دەسەڵات جێی پێدراوە و بەرژەوەندی گەل هیچ جێگایەکی نییە، بۆ هەمووان ئاشکرایە کە مەودایەکی گەورە کەوتووەتە نێوان کۆمەڵگا و دەسەڵات، کە دەسەڵات بەردەوام بە دروشمە ویشک و بێ ناوەڕۆکەکان هەوڵەدەدات ئەو مەودایە و لێکەوتەکانی پڕبکاتەوە و بیشارێتەوە، قەیرانی کۆرۆنا لە وڵاتەکەماندا، بێگومان ئەنجامی بەڕیوبەرایەتی هەڵە و هەوڵدان بۆ گەڕانەوەی ڕەوایەتی لەدەستچووی دەسەڵاتە، دەسەڵات بەردەوام کێشەکان لە ڕوانگەی سیاسیی و ئەمنییەتییەوە دەبینێت و ڕێکارەکانیشی هەر لەم چوارچێوەیەدایە، هەبوونی هەمیشەیی ئەم ڕوانگەیەش بۆ لە ئەستۆنەگرتنی ئەرکەکانیەتی، بەم دواییانەش دەبینین کە پێچەوانەی هەموو پێوانە نێونەتەوەیی و مرۆڤدۆستانەکان، مافی سەرەتایی زیندانیان نەک تەنها ڕەچاو ناکرێت، گەیشتووەتە قۆناغێکی قەیراناوی و مەترسیدار، لەگەڵ دۆخی خراپ و کارەساتباری زیندانەکانی ڕژێم بە تایبەت لە بواری پاکوخاوێنی و تەندروستیدا، ئەمکارە نیگەرانییەکی قووڵی لەناو کۆمەڵگا، خانەوادەی زیندانیانی سیاسی و چالاکوانانی مافەکانی مرۆڤ لە ئاستی ئێران و جیهان دروست کردووە".

هەروەها هاتووە:"دەسەڵاتی ئێران بەرپرسە لە تەندروستی جەستەیی و دەرونی هەموو زیندانیانی سیاسی، پێویستە بۆ مسۆگەربوونی مافی زیندانیانی سیاسی بەپێی پەیماننامە و پێوەرە نێونەتەوەییەکان (کە ئێرانیش تێیاندا ئەندامە)، بەرپرسیارانە و بە دوور لە بەرژەوەندییەکانی دەسەلاتی خۆی هەڵسوکەوت بکات، پارتی ژیانی ئازادی کوردستان- پژاک، هەر چەشنە خامسەردی و بێباکی لەم بوارەدا کە ببێتە هۆی هەڕەشەی جەستەیی و دەرونی زیندانیانی سیاسی، بە کردەوەیەکی بە مەبەست لەلایەن دەسەڵاتەوە دەزانێت و بە ڕووداوێکی سروشتی نابینێت".

پژاک ڕاشیگەیاندووە، کە بەرپرسیارێتی هەر چەشنە ڕووداوێک کە تەندروستی و ژیانی زیندانیانی سیاسی بخاتە مەترسییەوە لە ئەستۆی ڕژێمی ئیراندایە و ئەوان چاوپۆشیی لێناکەن، هەروەها "داوا لە هەموو لایەنەکان، چالاکوانانی مەدەنی و مافەکانی مرۆڤ و خانەوادەی زیندانیانی سیاسی دەکات کە لەم بابەتەدا هۆشیارانە و مرۆڤدۆستانە کار بکەن".

س.ح