پۆڵەندا، كۆنفرانسی وارشۆ بە ئامادەبوونی ٧٠ وڵات دەستیپێكرد

بەبەشداری زیاتر لە ٧٠ وڵاتی جیهان كۆنفرانسی وارشۆ بۆ "پەرەپێدانی ئاشتی و ئاسایش لە ڕۆژهەڵاتی ناوەڕاست" لە وڵاتی پۆڵەندا دەستی بە كارەكانی كرد.


دوێنێ ئێوارە لە وارشۆی پایتەختی پۆڵەندا كۆنفرانسی "پەرەپێدانی ئاشتی و ئاسایش لە ڕۆژهەلاتی ناوەڕاست" كە بڕیارە ڕێكارەكانی جێگركردنی ئاشتی و ئاسایشی هەمیشەیی لە ڕۆژهەڵاتی ناوەڕاست تاوتوێ بكات، بە ئامادەبوونی كاربەدەستانی باڵای زیاتر لە ٧٠ وڵاتی جیهان دەستی بە كارەكانی كرد.

دوێنێ مایك پۆمپیۆ، وەزیری دەرەوەی ویلایەتە یەكگرتووەكانی ئەمریكا و سەرۆك كۆماری پۆلەندا كۆنگرەیەكی ڕۆژنامەنووسی هاوبەشیان ئەنجامدا و تێدا مایك پۆمپیۆ، ئامانجی كۆنفرانسەكەی، بە دەستپێگەیشتن بە ئاشتی لە ڕۆژهەڵاتی ناوەڕاست و نەهێشتنی ئەو ئاڵۆزیانەی چەندین ساڵە لە ناوچەكەدا هەیە لەناوچەیەكە لێكدایەوە.

وەزیری دەرەوەی ئەمریكا پێشتر ڕایگەیاندبوو كە یەكێك لە ئامانجە گرنگەكانی ئەم كۆنفرانسە، تاوتوێ كردنی ڕێگاكانی وەستانەوەیە لە بەرامبەر كردەوەكانی ئێران لە ناوچەكە، كە بریتین لە بەرنامەی موشەكی، دەستێوەردانەكانی تاران لە كاروباری وڵاتانی عەرەبی و پاڵپشتیكردنی ماددی تیرۆر لە جیهاندا.

بنیامین ناتانیاهۆ، سەرۆك وەزیرانی ئیسرائیل، كە یەكێكە لە بەشداربووانی كۆنفرانسەكە، ئاماژەی بەوەدا كە ئەو كۆنفرانسە دەبێتە هۆی هاوپەیمانی زۆربەی وڵاتانی جیهان و ناوچەكە لەدژی ئامانجەكانی كۆماری ئیسلامی ئێران وتیشی: دەستدرێژی و داگیركردنی ڕۆژهەڵاتی ناوەڕاست و لەناوبردنی ئیسرائیل ئامانجەكانی ئێرانن.

 هەر لەسەر ئەو بابەتە دوێنێش محەمەد جەواد زەریف، وەزیری دەرەوەی ئێران لە تویتێكدا ئەو كۆنفرانسەی بە یاری 'سێرك'  لەقەڵەمدا و وتی: كۆنفرانسەكە لە ئێستاوە شكشتی هێناوە، زەریف چەند كاتژمێرێك دوای تەقینەوەكەی دوێنێی پارێزگای بلووچستان، كە تێدا هێرش كرایە سەر پاسێكی گواستنەوەی ئەندامانی پلەداری سوپای پاسداران و ٤٠ كوژراو و برینداری لێكەوتەوە، تویتەكەی نووسیوە و وەك پرسیارێك دەڵێت: "ئایا ڕوودانی هێرشێكی تیرۆریستی لە ئێران، ڕێك لە ڕۆژێكدا كە 'سێركی وارشۆ' دەستپێدەكات، ڕێكەوتە؟" هەروەها لە تویتەكەیدا زەریف، ئاماژە بە گردبوونەوەی ڕێكخراوی موجاهدین لە وارشۆ دژ بە ئێران دەكات و بە تیرۆریست ناویان دەبات.

دوابەدوای ئەوە وەزارەتی دەرەوەی پۆڵەندا لە لاپەڕەی فەرمی تویتەری خۆیدا، وەڵامی زەریفی داوەتەوە و نووسیویەتی كە "ئێمە تیرۆریزم بە هەر شێوەیەك شەرمەزار دەكەین و كاردانەوەمان بەرامبەر ئەو ڕووداوەی بەلووچستانیش هەروایە، بەڵام هیچ تیرۆریستێك لە وارشۆ بوونی نییە، لێرەدا دیموكراسی، ئازادی ڕادەربڕین و یەكگرتن هەیە".

كۆنفرانسی وارشۆ لە ژێر ناوی "پەڕەپێدانی ئاشتی و ئاسایش لە ڕۆژهەلاتی ناوەڕاست" كە بە میوانداری ئەمریكا و پۆڵەندا دوێنی لە وارشۆی پایتەختی وڵاتی پۆڵەندا دەستی بە كارەكانی كردووە، ئەمڕۆ كۆتایی بە كارەكانی دێنێت و بڕیارە وڵاتانی ئامادە لەو كۆنفرانسە ئەنجامی كارەكانیان لە بڕیارنامەیەكی هاوبەش ڕابگەینن.

د.ع