شەممە, 6 يون 2020 – 22:04 ڕۆژنیوز – ناوەندی هەواڵەکان
ئەلمانیا
لە شاری گۆتینگەنی شاری ئەلمانیا بە دەستپێشخەری بزوتنەوەی گەنجانی شۆڕشگێر و ژنانی گەنجی ئازاد چالاکیەکیان سازکرد، چالاکوانە کوردستانی و نێودەوڵەتیەکان (ئەنتەرناسلیۆنالیست) گۆشەگیریی ئیمرالی و کودەتاکەی پەرلەمانیان ڕسوا و شەرمەزار کرد، هاوکات بانگەوازیەکیان ئاڕاستەی ڕێکخراوەکانی ئەوروپا کرد، کە لە بەرامبەر ئەو هێرشە ڕەگەزپەرەستانە بێدەنگ نەبن.
بویسبورگ
لە شاری بویسبورگی ئەلمانیاش لە بەردەم وێستگەی قیتار گردبوونەوەیەک بەڕێوەچوو، لەو چالاکیەشدا هێرشەکانی زینی وەرتێ لە باشوری کوردستان و دەستبەسەراگرتنی ٥ شارەوانی هەدەپە و هەڵگرتنی پارێزبەندی ئەندام پەرلەمانەکانی هەدەپە، شەرمەزار کرا.
لەو چالاکیەدا بە زمانی ئەلمانی و کوردی پەیمان پێشکەشکران و بانگەوازیی ئاڕاستەی دەوڵەتانی ئەوروپا کرا، کە لە بەرامبەر هێرشە داگیرکاریەکان بێدەنگ نەمێننن و هەڵوێست بنوێنن.
سوید
لە شاری ستوکهۆلمی پایتەختی سویدیش بۆ پشتیوانی یەکگرتنی ژنانی عەفرین و لەیلا گوڤەن ئەندام پەرلەمانی هەدەپە، چالاکیەک بەڕیوە چوو.
ژنانی کورد لەو چالاکیەدا هێرشەکانی دەوڵەتی تورک و چەتەکانی داعشیان لە دژی عەفرین، ڕسوا و شەرمەزار کرد.
چالاکوانەکان ڕایانگەیاند بڕیاریان داوە، هەموو هەفتەیەک ڕۆژانی سێشەممە لە گۆڕەپانی سەلگەلستۆرگ کاتژمێر ١٣:٠٠ چالاکی ئەنجام بدەن.
بەلجیکا
لە شاری بروکسلی پایتەختی بەلجیکاش بە بەشداریی ڕێکخراوەکانی TJKE, NAVBEL و SKB چالاکیان ئەنجامدا، لە چالاکیەکەدا کودەتاکەی ڕژێمی ئاکەپە/مەهەپە لە پەرلەمانی تورکیا و لێسەندنەوەی مافی پارێزبەندی لە دوو ئەندام پەرلەمانی هەدەپە، ڕسوا و شەرمەزار کرا و باس لەوە کرا کە لە کەسایەتی لەیلا گوڤەندا دەیانەوێت دەست بەسەر ئیرادەی کوردستاندا بگرن.
د.ع
