گروپی دۆستانی كورد لە پەرلەمانی ئەوروپا ڕایانگەیاند، دەوڵەتی تورك تاوانی جەنگ ئەنجام دەدات و هاوڵاتیانی مەدەنی دەكوژێت و دژی ڕێككەوتننامە نێونەتەوەییەكان و یاسا هەڵسوكەوت دەكات، دەشڵێن: ئەگەر كۆتایی بەو هێرشانە نەهێنێت، پێویستە یەكێتیی ئەوروپا سزای ئابووری و سیاسی بەسەر توركیادا بسەپێنێت.
لە كۆنفرانسێكی ڕۆژنامەنووسیی لە ستراسبۆرگ، گروپی دۆستانی كورد لە پەرلەمانی ئەوروپا ڕایانگەیاند، دەوڵەتی تورك تاوانی جەنگ ئەنجام دەدات و هاوڵاتیانی مەدەنی دەكوژێت و دژی ڕێككەوتننامە نێونەتەوەییەكان و یاسا هەڵسوكەوت دەكات.
هەریەك لە ئاندرێس شیدەر، وتەبێژی فراكسیۆنی سۆسیال دیموكراتەكانی نەمسا، نیكۆلاج ویلیامسۆن، جێگری سەرۆكی فراكسیۆنی چەپ و ڕێكخەری گروپی دۆستایەتیی كورد، فرانسوا ئەلفۆنسی لە فراكسیۆنی ئەوروپای ئازاد (EFA)، ئەڤین ئینجەر لە فراكسیۆنی سۆسیال دیموكراتەكان و كاترین لانگیسپین لە فراكسیۆنی سەوزەكان بەشداری كۆنفرانسە ڕۆژنامەنووسیەكە بوون.
ئاندرێس شیدەر، هێرشەكانی سوپای داگیركەری تورك و هێرشەكانی ئێرانی بۆ سەر خاكی عێراق شەرمەزار كرد و داوای لە یەكێتیی ئەوروپا و دامەزراوەكانی دیكەی یەكێتیی ئەوروپا كرد، كە لە دژی ئەو هێرشانە بوەستنەوە و دەست بە جموجوڵ بكەن.
لای خۆشیەوە نیكۆلاج ویلیامسۆن، جێگری سەرۆكی فراكسیۆنی چەپ ڕایگەیاند، هێرشەكانی ئەردۆغان گورزێك بوو لە تێكۆشانی دژ بە داعش و وتی: ئەگەر كۆتایی بەو هێرشانە نەهێنێت ئەوا پێویستە یەكێتیی ئەوروپا سزای ئابووری و سیاسی بەسەر توركیادا بسەپێنێت.
هەروەها، ئەڤین ئینجەر لە فراكسیۆنی سۆسیال دیموكراتەكان داوای لە ڕایگشتیی نێونەتەوەیی كرد، دەستبەكار بن و هەڵوێست وەربگرن و پارێزگاری لە كوردان بكەن.
ڕ.ڕ
