گەنجانی سلێمانی لە دژی دەوڵەتی تورک گردبوونەوە

ئەمشەو لەبەردەم باخی گشتی لە شاری سلێمانی، کۆمەڵەی گەنجانی وڵاتپارێزی کودستان، گردبوونەوەیکی بە مەشخەڵیان ڕێکخست، لە دژی داگیرکارییەکانی دەوڵەتی تورک بۆسەر خاکی باشوری کوردستان و گۆشەگیریی سەر ڕێبەری گەلی کورد عەبدوڵا ئۆجالان و شێواندنی گڵکۆی شەهیدان لەلایەن دەوڵەتی تورکەوە، دروشمیان دژی کارە دوژمنکارییەکانی دەوڵەتی تورک وتەوە.


گەنجان بە هەڵکردنی مەشخەڵ و وێنەی شەهیدان و بەرزکردنەوەی پەنجەی سەرکەوتن و بە وتنەوەی دروشمی (بۆ دەرەوە.. بۆدەرەوە.. سوپای تورکیا بۆ دەرەوە، بێ سەرۆک ژیان نابێت، شەهید نامرن) درێژەیان بە گردبوونەوەکەیاندا و لە کۆتایشدا بەیاننامەیەکیان خوێندەوە.

قانع قادر، بەیاننامەی گردبوونەوەکەی خوێندەوە و تیایدا هاتبوو: داگیرکەری تورک چەندین ساڵە گۆشەگیریی لەسەر ڕێبەری گەلی کورد عەبدوڵا ئۆجەلان بەڕێوە دەبات ئەمە خۆی لە خۆیدا گۆشەگیریی و هێرشە بۆ سەر گەلی کورد و هەموو پێوانەکانی ئازادیی و مرۆڤایەتی بەم گۆشەگیریە هێرش دەکەنە سەر ئیرادە و تیکۆشانی ئازادی گەلی کورد.

ئەوەش هاتبوو تیایدا: داگیرکەری تورکی فاشیست بەمەشەوە نەوەستاوە تەرمی کوردان لە گۆڕەکان دەردەهێنن لە ژێر شەقامەکاندا دەیشارنەوە و بێ ڕێزیی و بێ ‌‌‌‌‌حورمەتییان گەیاندۆتە لوتکە، بە گەلی کورد دەڵێن کە نەکو تەنیا مافی ژیان بۆ ئێوە بە ڕەوا نابینین بەڵکو بە مردویش دەست لە ئازاردانی کوردان هەڵناگرین.

لە درێژەی بەیاننامەکەدا ئەوەش هاتبوو: ئەم دۆخە دۆخی بە ئاگا هاتنەوەی گەلی کوردە لە دژی ئەم دڕندایەتیانە و دەبێت بە هەڵوێستێکی یەکگرتوانە و بە هێز وەڵامی ئەم هێرشە دڕندانەی تورکیای داگیرکەر بدەینەوە، ئەم دڕندایەتییە، تەنیا لە دژی پارچەیەکی کوردستان یان حزبێک و لایەنێک نییە ئامانجی تەواوی کورد و خاکی کوردستانە.

لە کۆتایشدا تیایدا هاتبوو: وەکو گەنجانی وڵاتپارێزی کوردستان و ژنانی گەنجی تیکۆشەر تەواوی ئەم هێرش و بێ ڕێزی و گۆشەگیرییە بە توندی شەرمەزار و مەحکوم ئەکەین بانگی تەواوی گەنجانی کوردستان دەکەین کە ئەمرۆ کاتی هەڵوێست نیشاندانە پێویستە خاوەنداریی لە گەل و خاکی خۆمان بکەین.

هەروەها هاتبوو: لە چوارچێوەی ئەم بانگەوازییەدا ڕێپێوانی درێژ مەودای گەنجانی باشوری کوردستان بەرەو زینی وەرتێ بەرز ئەنرخێنین و شەرمەزاریش بۆ ئەو هێزە ئەمنییەی سەر بە یەکێتی نیشتمانی کوردستان، کە ڕێگرییان کرد لەو گەنجانە تا بگەنە زینی وەرتی لە دۆخێکی وەهادا پیوستە هەموو لایەنە سیاسیەکان بە هەستیاریەوە هەلسوکەت بکەن و لە بەرەی گەلدا جیگای خۆیان بگرن.

شایەنی باسە وا بڕیار بوو گەنجانی وڵاتپارێزی کوردستان ئەمشەو بە ئەنجامدانی  ڕێپێوانک هەڵوێستی خۆیان نیشان بدەن، بەڵام لەلایەن هێزەکانی ئاسایشی سلێمانییەوە بە بیانوی نا لەباری دۆخی ئەمنی ڕێگایان پێ نەدرا و بە گردبوونەوەیەک کۆتاییان بە چالاکییەکەیان هێنا.

د.ع