ڕەئوف ئاكرەیی یەکەم ڕۆژنامەنووسی تیرۆرکراوی باشووری کوردستان

٢٦ ساڵ لەمەوبەر ڕەئوف ئاكرەیی، لە شاری دهۆك، وەک یەکەم ڕۆژنامەنووس و چالاكوانی سیاسی لەلایەن چەند چەكدارێكەوە تیرۆر كرا و تا ئێستاش هیچ كەسێك بە تۆمەتی ئەو تیرۆرە دەستگیر نەكراوە، هاوخەباتێكیشی ئاشكرای دەكات كە ئۆجالان، لە ڕێگەی شەهید ڕەئوفەوە پەیامێكی بۆ بەرپرسانی بەرەی كوردستانی ناردوە.


شەوی ٢٦/٢٧ی ئایاری ١٩٩٣، لە شاری دهۆك و لەبەردەم ماڵەكەی، ڕۆژنامەنووس و چالاكوانی سیاسی (ڕەئوف كامل ئاكرەیی) لەلایەن چەند چەكدارێكەوە تیرۆركرا و تا ئێستاش هیچ كەسێك بە تۆمەتی ئەو تیرۆرە دەستگیر نەكراوە، ئەوەش بە یەكەمین تیرۆری رۆژنامەنووس و ڕووناكبیران دادەنرێت كە دوای ڕاپەڕینی باشووری كوردستان ئەنجامدرابێت، ڕۆژنیوز، بەدواداچوون بۆ کەیسەکە دەکات و لە زاری هاوخەبات و هاوگەشتێكی شەهید ڕەئوف چەند زانیارییەکی نوێ ئاشكرا دەكات.

شەهید ڕەئوف، ئەوكاتەی كە تیرۆر كرا، سەرنووسەری ڕۆژنامەی ڕێگای ڕەنجدەران بوو، كە بە هەردوو زمانی كوردی و عەرەبی دەردەچوو، هاوكات خاوەنی چەند کتێبێک بوو شۆڕشگێڕێكی بە دیسپلین و بیرمەندێكی پابەند بوو بە بیروباوەڕەكانی بۆ خەباتكردنی لە پێناوی كرێكاران و ڕەنجدەران.

كاوە نادر، كە یەكێكە لە هاوخەبات و هاوڕێبازی شەهید ڕەئوف لەبارەی ئەو شەهیدەوە رایدەگەیەنێت: "زوڵمێكی گەورە لە سەركردەیەکی وەك كاك رەئوف کرا كە شەهید كرا كە تەنها قەڵەمێك و بیروباوەڕەكەی هەبوو بۆ خەبات لە پێناو كوردستان، ئەوەش دوژمنەكانی ترساندبوو چونکە كەسێكی بە توانا بوو، بۆیە لەشەوی ٢٦/٢٧ی مانگی پێنج شەهید كرا".

"نەیانهێشت كەسوكاری بیبینێت"

ئەوكاتەی كە شەهید دەكرێت، بە بیانووی جیاواز ئاسایش ڕێگە نادات كەسوكاری بیبینن، لەوبارەیەوە ئەو هاوڕێیەی شەهید ڕەئوف دەڵێت: "كە شەهید كرا ئاسایشی دهۆك تەرمەكەیان بردە نەخۆشخانە و دەرفەت بە كەسوكاری نەدرا بیبینن، تائێستا هەر دۆسیەكەی ماوە، هەر دۆسیەیەكیش تاوانبارەكەی نەدۆزرێتەوە دەسەڵات لێیان بەرپرسە".

"لەسەر داوای میتی تورك تیرۆر كرا"

ئەو هاوڕێیەی شەهید ڕەئوف لە درێژەی قسەكانیدا ئاماژە بەوە دەكات كە، ئەو لەسەر داوای میتی توركی تیرۆر كراوە "من دەپرسم كە چ قازانجێك لە شەهیدبوونیا هەبوو، تەنها دوژمن دڵی پێ خۆش بوو، لەسەر داوای میتی توركی بە پارە كراوە، ئێمە لەگەڵ شەهید ڕەئوف بەیەكەوە خەباتمان كردووە هەر لە خوێندكاران تا ڕەنجدەران".

شەهید ڕەئوف و سەردانی ئۆجالان

سەبارەت بە سەردانی شەهید ڕەئوف بۆ لای عەبدوڵڵا ئۆجالان، سەرۆكی پارتی كرێكارانی كوردستان (پەکەکە)، كاوە نادر ئاماژەی بەوەكرد كە لەگەڵ شەهید ڕەئوف ساڵی ١٩٩٢ پێكەوە سەردانی ئۆجالانیان كردووە لە بیقاع و وتی: "ئێمە سەردانی عەبدوڵا ئۆجەلانمان كرد كە ئەوكات لە دەشتی بیقاع بوو، ئۆجالان زۆر ڕێزی لە شەهید ڕەئوف گرت"، هەروەها "ئەكادیمیای شەهید مەعسوم كوركمازشوێنێك بوو وەك ئەكادیمیا، كە سەربازگە و فێرگە بوو ئەو ئێمەی بینی و بە ڕاشكاوی بەیەكەوە قسەمان كرد".

ئۆجالان شەهید رەئوفی پێش خۆی دەخست

سەبارەت بە پەیوەندی و هاوفكری شەهید رەئوف لەگەڵ ئۆجالان، كاوە نادر ئاماژە بەوە دەكات كە ئۆجالان هاوڕێیانە لەگەڵمان ڕەفتاری دەكرد و زۆرجار لە ڕێگاكاندا شەهید ڕەئوفی پێش خۆی دەخست و وتی: زۆرجار لە ڕێدا كاك ڕەئوفی پێش خۆی دەخست، هەروەها داوای كرد كە وەك هاوڕێیەك قبوڵی بكەین، ئەوە شایەتیدانێكی گەورەبوو كە ڤیدیۆیەكەشی ماوە، تا ئێستاش قەرزارین بەرامبەری و هەست دەكەم گەورەیی خۆی نیشانداین".

"ئۆجالان قسەكانی بۆ ڕاست دەكردینەوە"

لەبارەی بینینی ئۆجالانەوە كاوە نادر، وتی: "من زۆر سەركردەم دیووە و كەسایەتی حزبەكانم دیووە، كەس بەئەندازەی ئۆجالان گوێگر نەبووە، كەس بە ئەندازەی ئەو قسەی وەرنەدەگرت، زانیاری زۆری هەبوو، هەندێك جار قسەكانی بۆ ڕاست دەكردینەوە".

بۆ گردبوونەوەی بیروباوەڕی كوردایەتی سەردانی ئۆجالانیان كرد

ئەو هاوڕێیەی شەهید رەئوف لەبارەی هۆكاری سەردانەكەیان بۆ ئەكادیمیای مەعسوم كوركماز وتی: "ئێمە سەردانەكەمان بۆ ئەوە بوو كە هەركەس ئەوەی بیروباوەڕی كوردایەتی هەبوو چۆن گردبینەوە؟ ئەوكاتەش گرژی لە نێوان بەرەی كوردستانی و پارتی كرێكاران هەبوو، بۆیە ئێمە چووبووینە لای، پێشتریش چەند حزبێك سەردانیان كردبوو".

"ئۆجالان وتی كاغەزی سپی واژۆ دەكەم"

ئۆجالان هێندە باوەڕی بە شەهید ڕەئوف هەبووە، وەكو كاوە نادر ئاماژەی پێدەكات كە بە شەهید ڕەئوفی وتووە لەپێناو خزمەتی كوردستان كاغەزی سپی واژۆ دەكات بۆ ئەوەش سێ خاڵی داونەتێ بۆ ئەوەی لە باشووری كوردستان كاری لەسەر بكرێت.

كەس گوێی بە سێ خاڵەكەی ئۆجالان نەدا

كاوە نادر، لەبارەی پێشنیازەكانی ئۆجالان و هێنانەوەی بۆ بەرپرسانی بەرەی كوردستانی ئەوكات وتی: "بەداخەوە ئێمە پێشنیازەكانیشمان پێدان بەڵام كەس بە قسەی نەكردین و گوێیان نەگرت، تەنها نەوشیروان مستەفا نەبێ گوتی ئێوە خۆتان لە ئاسنی سارد دەدەن، چونكە كورد فرۆشراوە، ئەوە بۆ شایەتی دەڵێم، بەڵام ئەوانی دیكە هەموو بەڵێنی زۆریاندا تەنانەت حكومەتی هەرێمیش بەڵێنیدا كە من خۆم سەردانم دەكردن، بەڵام بەداخەوە شەڕ هەڵگیرسا لە نێوانیاندا و كارەساتێكی گەورە ڕوویدا".

ک.س