"ئه‌گه‌ر کورد و هه‌ده‌په‌ بیت ئه‌وا دادپه‌روه‌ریی ناتگرێته‌وه‌"

وته‌بێژی هه‌ده‌په‌ ڕایگه‌یاند، ئاکه‌په‌ و داموده‌زگه‌کانی ده‌ڵێن «ئه‌گه‌ر تۆ کورد و هه‌ده‌په‌ بیت، ئه‌وا دادپه‌روه‌ریی ناتگرێته‌وه‌». وتیشی، گۆشه‌گیریی سه‌ر ئیمراڵی گۆشه‌گیرکردنی هه‌موو کوردانه‌.


مانگرتنه‌کان له‌ خواردن که‌ له‌پێناو هه‌ڵگرتنی گۆشه‌گیریی سه‌ر ئۆجالان و پشتیوانیکردن له‌ مانگرتنی له‌یلا گیوڤه‌ن، په‌رله‌مانتاری پارتیی دیموکراتیی گه‌لان -هه‌ده‌په‌ به‌ڕێوه‌ده‌چن، ئه‌مڕۆ کۆتاییان هات، له‌ سێیه‌مین ڕۆژی مانگرتنه‌که‌ش له‌ ئیسته‌نبووڵ، له‌ بینای ڕێکخستنه‌کانی هه‌ده‌په‌ی شاره‌که‌، به‌ به‌شداریی وته‌بێژی هه‌ده‌په‌ سارووهان ئۆلووچ و په‌رله‌مانتارانی هه‌ده‌په‌ هودا کایا، دڵشاد جانباز و عه‌لی که‌نانئۆغلوو کۆنفڕانسێکی ڕۆژنامه‌وانیی ساز کرا.

سارووهان ئۆلووچ وته‌بێژی هه‌ده‌په‌ ڕایگه‌یاند: ئێستا له‌ ئه‌نقه‌ره‌ کۆبوونه‌وه‌ی ئه‌نجومه‌نی به‌ڕێوه‌به‌رایه‌تیی ناوه‌ندیی هه‌ده‌په‌ به‌ڕێوه‌ده‌چێت، دوای کۆبوونه‌وه‌که‌ هێڵه‌کانی تێکۆشانی ئێمه‌ ده‌ستنیشان ده‌کرێن، ئۆلووچ سڵاوی له‌ به‌رخۆدانی په‌رله‌مانتاری هه‌ده‌په‌ له‌یلا گیوڤه‌ن کرد که‌ له‌ زیندان مانی له‌ خواردن گرتووه‌.

"ئه‌گه‌ر کورد بیت دادپه‌روه‌ریی ناتگرێته‌وه‌"

وته‌بێژی هه‌ده‌په‌ له‌ درێژه‌ی قسه‌کانیدا ئاماژه‌ی بۆ ئه‌وه‌ کرد، ئاکه‌په‌ و داموده‌زگه‌کانی دادگه‌ریی ده‌ڵێن، «ئه‌گه‌ر تۆ کورد و هه‌ده‌په‌ بیت، ئه‌وا دادپه‌روه‌ریی ناتگرێته‌وه‌». ئۆلووچ سه‌رنجی خسته‌ سه‌ر زیندانیکردنی وته‌بێژی شاندی ئیمڕاڵی سڕی سووره‌یا ئۆنده‌ر و ڕایگه‌یاند: «ئۆنده‌ر به‌هۆی سزایه‌کی ناڕه‌وا خراوه‌ته‌ زیندان، هاوسه‌رۆکی گشتیی پێشوومان سه‌ڵاحه‌دین ده‌میرتاشیش سزایه‌کی ناڕه‌وای بۆ بڕاوه‌ته‌وه‌، سه‌ره‌ڕای بڕیاری دادگه‌ی مافی مرۆڤی ئه‌ورووپا بۆ ئازادکردنی، ده‌میرتاش ئازاد نه‌کرا".

ئەوەشی وت: «بانگ له‌ هه‌موو لایه‌نگرانی ئاشتی و دیموکراتی له‌ تورکیا ده‌که‌م، تێکۆشانی دادپه‌روه‌ری، ئازادی و حقووقیی به ‌ته‌نیا هی هه‌ده‌په‌ نییه‌، ئه‌گه‌ر ئه‌مڕۆ له‌ به‌رانبه‌ر هێرشه‌کانی سه‌ر هه‌ده‌په‌ بێده‌نگ بن، پێتان وانه‌بێ که‌ هیچتان به‌سه‌ر نایه‌ت.»

ساروهان ئۆلووچ ڕاشیگه‌یاند، پێویسته‌ له‌یلا گیوڤه‌ن ئازاد بکرێت و کۆتایی به‌ گۆشه‌گیریی سه‌ر به‌ڕێز ئۆجالان بهێنرێت، ئه‌م گۆشه‌گیرییه‌ ته‌نیا له‌سه‌ر ئۆجالان نییه‌، به‌ڵکو له‌سه‌ر هه‌موو گه‌لی کورده‌.

 

ک.ک