"با ڕوسیا و سوریاش بزانن ده‌ست له‌ خاکمان به‌رناده‌ین"

خه‌ڵکی عه‌فرین و خانه‌واده‌ی شه‌هیدان که‌ به‌هۆی داگیرکاریی ده‌وڵه‌تی تورک کۆچیان کردووه‌ بۆ ناوچه‌ی شه‌هبا، له‌پێناو ڕزگارکردنی عه‌فرین خۆپیشاندانێکیان بۆ به‌رده‌م ناوه‌ندێکی سه‌ربازیی ڕوسیا له‌ گوندی وه‌حشیه‌ ساز کرد و ڕایانگەیاند، با ڕوسیا و سوریاش بزانن کە دەست لە خاک بەرنادەن.


ئەمڕۆ خانه‌واده‌ی شه‌هیدان و هاوڵاتییانی عه‌فرین له‌ دژی بێده‌نگیی ڕوسیا و سوریا له‌ به‌رانبه‌ر داگیرکاریی ده‌وڵه‌تی تورک و دروستکردنی دیوار له‌نێوان گونده‌کانی ناوچه‌ی شێراوا له‌ که‌مپی به‌رخۆدانه‌وه‌ ده‌ستیان به‌ ڕێپێوان کرد بۆ به‌رده‌م ناوه‌ندی سه‌ربازیی ڕوسیا له‌ گوندی وه‌حشیه‌.

دوای ئه‌وه‌ی خۆپیشانده‌ران گه‌یشتنه‌ به‌رده‌م ناوه‌نده‌که‌ درووشمه‌کانی "یان عه‌فرین یان عه‌فرین"یان وته‌وه‌، شاندێکی پێنج که‌سی له‌ نوێنه‌رانی خۆپیشانده‌ران به‌ مه‌به‌ستی گه‌یاندنی په‌یامه‌که‌یان چوونه‌ به‌رده‌م بینای ناوه‌نده‌که‌.

نامه‌که‌ له‌ لایه‌ن ئه‌ندامی ئه‌نجومه‌نی خانه‌واده‌ی شه‌هیدان شازیه‌ ئیبراهیم خوێندرایه‌وه‌. له‌ په‌یامه‌که‌دا هاتووه‌" ده‌وڵه‌تی ڕوسیا ئاسمانی عه‌فرینی به‌ ڕووی فڕۆکه‌کانی تورکیادا کرده‌وه‌ و ڕێگه‌ی پێدان بۆردومانی عه‌فرین بکه‌ن، له‌ ئه‌نجامدا هه‌زاران مرۆڤ که‌ ژن و منداڵیان له‌نێودابوو کوژران. با ڕوسیا و سوریا باش بزانن که‌ ئێمه‌ ده‌ست له‌ خاکی خۆمان به‌رناده‌ین، هه‌روه‌ها با هه‌موو جیهان بزانێت ڕوسیا سوریای پارچه‌ کرد، ئێمه‌ لێره‌ ناڕۆین تا وه‌ڵامێکمان نه‌درێته‌وه‌."

له‌ درێژه‌ی په‌یامه‌که‌دا ئاماژه‌ بۆ ئه‌وه‌ کراوه،‌ به‌ داگیرکردنی عه‌فرین داره‌ زه‌یتوونه‌کان بڕدراونه‌ته‌وه‌، هه‌روه‌ها جه‌ختیان له‌سه‌ر ئه‌وه‌ کردووه‌ته‌وه‌ که‌ ڕۆڵه‌کانیان هه‌میشه‌ ئاماده‌ن خاکی سوریا بپارێزن.

به‌هۆی وه‌ڵام نه‌دانه‌وه‌ی خۆپیشانده‌ران ئاپۆڕای گه‌ل ویستیان بچنه‌ نێو بینای ناوه‌نده‌که‌، به‌ڵام نوێنه‌رانی ڕژێمی سووریا و کاربه‌ده‌ستانی ناوه‌نده‌که‌ به‌ڵێنیان دا ڕۆژی دووشه‌ممه‌ وه‌ڵامیان بده‌نه‌وه‌، دواتر گه‌ل به وتنه‌وه‌ی درووشمه‌کان گه‌ڕانه‌وه‌ که‌مپه‌که‌یان.


ک.ک