به‌رهه‌م ساڵح و عه‌بدولمه‌هدی: لێپێچینەوە لەوانە دەکرێت توندوتیژییان بەکارهێناوە

به‌رهه‌م ساڵح و عادل عه‌بدولمه‌هدی‌ لە کۆشکی سەلام کۆبونەوە و گفتوگۆیان لە بارەی دۆزینەوەی ڕێگا چارەی گونجاو بۆ ڕووداوەکانی ئەم دواییە کرد، هاوکات جەختیان کردەوە کە لێپێچینەوە لەگەڵ ئەو کەسانە دەکەن کە کە توندوتیژیان لە خۆپیشاندانەکاندا بەکارهێناوە.


ئەمڕۆ بەرهەم ساڵح، سەرۆک کۆماری عێراق و عادل عەبدولمەهدی، سەرۆک وەزیرانی عیراق لە کۆشکی سەلام لەشاری بەغدا کۆبوونەوە.

لەبارەی کۆبونەوەکەوە نوسینگەی ڕاگەیاندنی سەرۆک کۆماری عێراق بڵاویکردەوە، سەرۆک کۆماری عیراق و سەرۆک وەزیرانی عیراق لەسەر ڕووداوەکانی عێراق گفتوگۆیان کردووە و جەختیان لە جێبەجێکردنی داواکاریەکانی خۆپیشاندەران کردەوە.

ئاماژە بەوەشکراوە، لە کۆبوونەوەکەدا لەسەر بەدیھێنانی داواکارییە ڕەواکانی خۆپیشاندەران و دابینکردنی خواستەکانی گەنجانی عێراق کە زامنی ژیانێکی شکۆمەند بکات بۆ گەنجان و ھاوڵاتیان، ھاوکات جەختیان کردوەتەوە کە لە لێپێچینەوە لەو کەسانە دەکەن کە توندوتیژیان کردوە بەرامبەر خۆپیشاندەران.

ئەوەش خراوەتەڕوو، هەردوولا لەسەر پارێزگاریکردن لە ئاسایش و سەلامەتی خۆپیشاندەران و ھێزە ئەمنیەکان و ڕێگریکردن لەو کەسانەی کە دەستڕێژی گولـلەیان کردوە بە ناو ئاپۆڕای خۆپیشاندەران و ھێزە ئەمنیەکاندا کردوەتەوە.

لە ڕاگەیەندراوەکەی سەرۆکایەتی کۆماری عێراقدا باس لەوەشکراوە کە گفتوگۆ لەبارەی دۆزینەوەی ڕێگەچارەی گونجاو بۆ ڕووداوەکانی ئەم دواییە، کە زامنی بەرژەوەندی گشتی و ئارامی وڵات بکات کراوە.

ک.س