بوڵدان لە پەرلەمانی تورکیاوە: پێكه‌وه‌ کۆتایی بە گۆشەگیری دێنین

هاوسەرۆکی گشتیی هەدەپە پەروین بووڵدان، ڕایگه‌یاند: دەبێت دەستبەجێ كۆتایی به‌ گۆشەگیریی بێت، كێشه‌كه‌ کێشەی هەموو گەلانی تورکیایە، بۆیه‌ ده‌بێت پێكه‌وه‌ کۆتایی بە گۆشەگیری بێنین.


ئەمڕۆ پەروین بوڵدان هاوسەڕۆکی گشتیی پارتی دیموكراتیی گەلان- هەدەپە، لە کۆبوونەوەی هەفتانەی فراكسیۆنه‌كه‌ی له‌ په‌رله‌مانی توركیا، وته‌یه‌كی پێشكه‌شكرد.

له‌ كۆبوونه‌وه‌كه‌دا كه‌ دایکانی لەچک سپی به‌شداربوون، سه‌ره‌تا پیرۆزبایی ١٥ی ئایار ڕۆژی زمانی كوردی كرد، پاشان سه‌رنجی خسته‌ سه‌ر گۆشه‌گیریی سه‌ر عه‌بدوڵا ئۆجالان ڕێبەری پەکەکە و چالاكییه‌كانی مانگرتنی بێسنوور و مانگرتنی تامردن.

بووڵدان وتی، ئەوان لە وەڵاتێکدان کە دادپه‌روه‌ری و دیموكراتی تێدا گۆشەگیرکراوە، وتیشی: گۆشەگیری تەنیا لە بەندیخانەکان نییه‌، بەڵکوو لە دەرەوەش هەیە، ئێمە بەگشتی گۆشەگیر کراوین، ئەگەر ئێوە لایەنگری ده‌سه‌ڵات نه‌بن ئه‌وا گۆشەگیر ده‌كرێن.

هاوسه‌رۆكی گشتیی هه‌ده‌په‌ ڕایگه‌یاند: په‌رله‌مانتاری ئێمه‌ لەیلا گیوڤەن ١٨٨ رۆژە لە دژی گۆشەگیری لە مانگرتندایه،. هه‌روه‌ها زیاتر له‌ ٣٠٠٠ زیندانیی سیاسی لە مانگرتندان کە گەورەترین چالاکی مانگرتنه‌ لە مێژووی کۆماردا، ٣٠ زیندانیی سیاسیش چالاکی خۆیان گۆڕی بۆ مانگرتن تا مردن.

 بوڵدان ئاماژەی بەوەشکرد: دایکان هەموو ڕۆژێك بۆ ئەوەی منداڵەکانیان گیان لە دەست نەدەن لە بەر ده‌رگه‌ی زیندانه‌كان هاوار ده‌كه‌ن، به‌ڵام بەهۆی ئەو داواکارییه‌یان ڕووبه‌ڕووی فشار و لێدان دەبنەوە، ئه‌م كاره‌ به‌ر بەرچاوی هەموو گه‌لانی تورکیا ده‌كرێت، ئەوە دەستپۆتیزم و فاشیزمە، ڕۆژێك دێت ئه‌م دوژمنانه‌ی مرۆڤایه‌تی باجی ئه‌م كارانه‌ بده‌ن، ئێمە بانگی دایکان دەکەین و دەڵێین 'نیگه‌ران مه‌بن، ئێمه‌ له‌گه‌ڵتانین، ئێمە پێكه‌وه‌ تێده‌كۆشین و پێكه‌وه‌ سەردەکەوین'.

له‌ بەردەوامیی وته‌كه‌یدا په‌روین بووڵدان ئاماژه‌ی به‌ چاوپێكه‌وتنی پارێزه‌ران له‌گه‌ڵ ئۆجالان كرد و وتی: بەڕێز ئۆجالان لە دوایین چاوپێکەوتنیدا بەئاشکرا پەیامی دا، هەفتەی ڕابردوو پاڕێزەران چوونە ئیمراڵی و چاوپێکەوتنیان ئەنجام دا، پەیامی ئیمراڵی زۆر گرنگە، ئەو بانگه‌وازه‌ی گفتوگۆ بۆ ئەوەی قۆناغێکی نوێ دەستپێبکات هیوایه‌كی نوێیە، بۆ ئەوەی دانوستانی دیموكراتی دەستپێبكات، ئه‌رك ده‌كه‌وێته‌ سه‌رشانی هەموو دیموكراتیخوازان، ئێمە بانگی هەموو کەسانی ئاشتیخواز و دیموكرات دەکەین کە بێدەنگ نه‌بن، داواكاریی هەڵگرتنی گۆشەگیری داواکارییه‌كی ڕەوا و یاساییە، ئەگەر ئەو داواکارییه‌ جێبه‌جێ بكرێت ئەوا لە بواری کۆمەڵایەتی ئارامییه‌ك دێته‌ ئاراوه‌ و و‌ڵات هەناسەیه‌ك ده‌دات، دەبێت بەزووترین کات گۆشەگیری هه‌ڵگیرێت، ئێمە وەک هەدەپە بەڵێن دەدەینه‌ ئەو دایکانەی كه‌ ئەمڕۆ هاتوونەتە ئێرە، گۆشه‌گیری تەنیا پەیوەندی بە ئێوه‌ نییه‌ بەڵکوو په‌یوه‌ندی بە هەموو ئەو گه‌لانه‌وه‌ هه‌یه‌ کە لە تورکیا ده‌ژین، ئێمە هەموومان پێكه‌وه‌ تێده‌كۆشین، گۆشەگیری هه‌ڵده‌گرین و وا ده‌كه‌ین ڕۆڵه‌كانتان بژین.

س.ح