زانیاریی نوێ‌ لەسەر سوتاندنی خێزانە هەڵەبجەییەكە دەخرێتەڕوو

دوای ئەوەی لەهەفتەی ڕابردوو خێزانێكی هەڵەبجەیی، لەوڵاتی ئێران بەشێوەیەكی دڕندانە دەسوتێنرێن لەئێستادا باری تەندروستی ژنێكیان تەواو ناجێگیرەو، مەترسی تەواوەتی لەسەر ژیانی دروستبووە، کەس وکاری ئەو خێزانەش لە ڕێگای ڕۆژنیوزەوە داوا دەکەن تاوانباران سزا بدرێن.


هێمن باقی، عەزیمە حەمەساڵەح، چیا ناسر ئەو خێزانە بوون كەتووشی ڕوداوەكە بوون، ئێستا  خێزانی هێمن باری تەندروستی زۆر ناجێگیرەو سەرو دەموچاوی بەتەواوی سوتاوە لێدانی دڵیشی 1% بۆ 2% لێدەدات، بەهۆی ناجێگریی تەندروستی چیاوە جارێ‌ ناگەڕێنەوە كوردستان.

موحسین باقی برای هێمن بۆ ڕۆژنیوز وتی:" پاش ئەوەی ڕۆژی شەممەی ڕابردوو هێمنی برام لەگەڵ خێزانی و  خەسوی دا دەڕۆنە ئێران بۆ چارەسەری پزیشكی، لەو دیووی مەرزەوە توشی سێ‌ كەس دەبن، بەڵام كەسەكان خیانەتكار دەردەچن".  

وتیشی":پاش ئەوەی دەیانبەنە ماڵەوە دەرمانخواردیان دەكەن، لەجێگەیەكی دووردا بەنزینیان پێدادەكەن و دەیانسوتێنن، دواتریش خەسوی هێمن هانا بۆ خەڵكی ناوچەكە دەهێنێت، دەیانبەنە نەخۆشخانەی ئیمام خومەینی لەشاری ئورمیە لەوێ‌ چارەسەریان بۆ دەكەن، ئێستا باری تەندروستی عەزیمە كەدەكاتە خەسوی  هێمن  زۆر جێگیرە، بەڵام تەندروستی چیا زۆر ناجێگیرەو زیاتر لە 90%ی جەستەی سوتاوە".

موحسین باقی زۆر سوپاسی تەواوی بەرپرسانی ئیدارەی هەڵەبجەشیكرد، کە بەهەموو شێوازێك بەدەم كێشەكەیانەوە هاتوون، داواشیکرد ئەو كەسانەشی تاوانەكەیان ئەنجام داوەکە ئێستا دەستگیركراون، لەلایەن دەسەڵاتدارانی ئێرانەوە سزایەكی زۆر قورسیان بدات، خەسوی هێمنیش تاوانبارەكانی بینووە لەكاتی دەستگیركردنەدا، لەلایەن بەرپرسانی ئێرانەوە پێیان وتوون "ئیجرائاتی زۆر قورسیان لەگەڵدا دەكرێت".

کەسوکاری ئەو خێزانە باس لەوە دەکەن، كونسوڵی عێراق لە ئێران، هەروەها نوسینگەی جێگری حكومەتی هەرێم پەیوەندییان پێوەكردوون بەڵێنی هەموو چارەسەرێكیان پێداون لەدابینكردنی خەرجی و شوێنی مانەوە بۆیان لەوڵاتی ئێران.

هاوكات حەمیدە حەمەئەمین دایكی هێمن بۆ ڕۆژنیوز وتی: خوای گەورە هەقمان بستێنێت، داواكاریشم لەحكومەتی ئێران ئەو تاوانبارانە لەسێدارەیان بدات بۆ ئەوەی ببێتە پەند بۆ هەموو كەسێك. 

ب.ش