شوێنی خۆپیشاندانەکان لە ڕۆژهەڵاتی کوردستان بڵاوکرایەوە

ژووری دەستپێشخەری گەل لە دووەمین ڕاگەیەندراویدا، بانگەوازی لە خەڵکی ڕۆژهەڵات کردووە خۆیان ئامادە بکەن بۆ "خولێکی نوێی بەرخۆدان و تێکۆشان بۆ بە دەستهێنانی مافە مرۆیی و دیموکراتییەکانیان" و ڕۆژی پێنجشەمە بڕژێنە مەیدانەکان.


دوێنی "ژووری دەستپێشخەری گەل" دوای یەکەم ڕاگەیەندراوی کە تێدا هەڵمەتی 'ئیدی بەسە'ی ڕاگەیاندبوو و لەلایەن خەڵکەوە پێشوازی لێیکرا، دووەمین ڕاگەیەندراوی لە ژێر ناوی "پێکەوە لەدژی فاشیزم" بڵاو کردووەتەوە و تێدا داوا لە خەڵکی ڕۆژهەڵاتی کوردستان کردووە ڕۆژی پێنجشەممە ١٤ی شوبات کاتژمێر ١٧:٠٠ بۆ ٢٠:٠٠ بڕژێنە شەقام و مەیدانەکانی شارەکانی ڕۆژهەڵاتی کوردستان.

ژووری دەستپێسخەری گەل لە ڕاگەیەندراوەکەیدا شوێنی خۆپێشاندانەکانی لە شارەکانی: سنە، سەقز، مەریوان، مەهاباد، بۆکان، ئورمیە، خوی، ماکۆ، کرماشان، جوانڕۆ، شاباد و ئیلام دیارییکردووە.

دەقی ڕاگەیەندراوەکەی ژووری دەستپێشخەری گەل بەو شێوەیە:

پێکەوە لەدژی فاشیزم

دوژمنان بە ساڵانە بە نیازی لەناوبردنی داوا ڕەوا و مرۆییەکانی گەلەکەمانن لە هەر چوار بەشی کوردستان، هەروەها بە ساڵانە گەلی کورد لە سەنگەری بەرخۆداندایە کە بەرخۆدانێکی بە واتا و شکۆدارە، تەمەنی ڕەشی دوژمنانی گەلەکەمان بەرەو کۆتاییە و هەڵاتنی خۆری ئازادی نزیک بووەتەوە.

ژووری دەستپێشخەری گەل پەیوەستە بە ڕاگەیەندراوی ژمارە یەکی خۆی، کە لە ڕێکەوتی ٧/١/٢٠١٩ بڵاویکردەوە، بانگ لە خەڵکی قارمانمان دەکات کە خۆی بۆ خولێکی نوێ بەرخۆدان و تێکۆشان بۆ بەدەستهێنانی مافە مرۆیی و دیموکراتییەکانی ئامادە بکات و بە بەرخۆدانێکی واتادار و شکۆمەندانە، ژیانێکی بە واتا و شکۆدار بۆ خۆی بخولقێنێت، بۆیە داوا لە هەموو خەڵکمان دەکەین ڕۆژی پێنجشەممە ١٤ی شوبات کاتژمێر ١٧:٠٠ بۆ ٢٠:٠٠ ی ئێوارە لە شەقام و مەیدانەکانی شارەکانیان دەست بە ڕێپێوانی بێدەنگ بکەن.

ناونیشانی شەقام و مەیدانەکان بەو شێوەیەیە:

سنە: مەیدانی ئازادی بەرەو سێڕێیانی ئەدەب

سەقز: مەیدانی هەڵۆ بەرەو مەیدانی جمهوری

مەریوان: شەقامی شەبڕەنگ بەرەو چوارڕێیانی سەرەکی

مەهاباد: مەیدانی شارداری بۆ چوارڕێیانی ئازادی

بۆکان: مەیدانی فەرمانداری

ئورمیە: شەقامی ئیمام بەرەوە مەیدانی ئەیالەت

خۆی: شەقامی ئیمام

ماکۆ: بوڵواری ڕەسالەت

کرماشان: مەیدانی ئازادی (گاراژ) بەرەو پارکینگی شارەداری

جوانڕۆ: شەقامی بهداری بەرەو مەیدانی بەسیج

شاباد: مەیدانی ئیمام بەرەو مەیدانی هدایەت

ئیلام: چوارڕێیانی سەعدی بەرەو مەیدانی ئیمام

س.ح